AMEA Nizami Gəncəvi adına Milli Azərbaycan Ədəbiyyatı Muzeyinin Gənc Alim və Mütəxəssislər Şurasının növbəti elmi seminar məşğələsi keçirilib.

Muzeyin doktorantı Türkan Qədirova üzərində çalışdığı dissertasiya işinin mövzu dairəsinə daxil olan “XX əsrin otuzuncu illərinə qədər poeziyada ana dili” problemi ilə bağlı məruzə edib.  Tarixə ekskurs edən məruzəçi milli dil, maarif, mətbuat tariximizin bu həlledici dövrü haqqında ətraflı məlumat verib.

T.Qədirova “Molla Nəsrəddini zəmanə özü yaratdı” sözlərinə istinadən, XX əsrin əvvəli milli oyanış və özünüdərkin möhtəşəm dayağı olan “Molla Nəsrəddin” məktəbi, həmçinin, “Füyuzat” dərgisi, eləcə də Azərbaycan Xalq Cümhuriyyəti ədəbiyyatının poetik və publisistik nümunələri əsasında bəhs edilən dövrün milli dil, düşüncə mühitinin analitik mənzərəsini uğurla yaradıb.

Seminar məşğələsi Şuranın sədri Nəzmiyyə Yigitoğlu, ekspert iştirakçı-filologiya üzrə fəlsəfə doktoru Məlahət Kələntərli, filologiya üzrə fəlsəfə doktoru Kəmalə Nuriyeva, doktorant Gülnar Əqiq və başqalarının sual və çıxışları ilə davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.