2018-ci il dövlət büdcəsi layihəsində mədəniyyət sahəsi üçün nəzərdə tutulan vəsait artırılmalıdır.

Bunu Milli Məclisin Mədəniyyət komitəsinin sədri, akademik Rafael Hüseynov parlamentin İnsan hüquqları, Regional məsələlər, Hüquq siyasəti və dövlət quruculuğu, Mədəniyyət, Gənclər və idman komitələrinin birgə iclasında "Azərbaycan Respublikasının 2018-ci il dövlət büdcəsi haqqında" qanun layihəsinin müzakirəsi zamanı deyib.

R.Hüseynov qeyd edib ki, dövlət büdcəsində mədəniyyət sahəsinə baxış kəskin şəkildə dəyişməlidir. Büdcənin vəzifəsi mədəniyyətin daha parlaq inkişafına dəstək vermək olmalıdır.

Musiqi məktəblərinin, teatrların, xüsusən rayonlarda olan mədəniyyət ocaqlarının gələcək taleyinin məhz bu vəsaitdən asılı olduğunu söyləyən millət vəkili bu sahələrə vəsaitin artırılmasının zəruri olduğunu bildirib: “Azərbaycanda 2800-dən artıq kitabxana var. Bu kitabxanaların fəaliyyəti bərpa olunmalı, onlar mədəniyyət mərkəzlərinə çevrilməlidir. Bütün bu məsələlər büdcədə mütləq nəzərə alınmalıdır”.

Qeyd edək ki, 2018-ci il üçün mədəniyyət, incəsənət, informasiya, bədən tərbiyəsi və digər kateqoriyalara aid edilməyən sahədə fəaliyyətin maliyyələşdirilməsi üçün nəzərdə tutulan xərclərin dövlət büdcəsi xərclərinin tərkibində xüsusi çəkisi 1,5 faiz olmaqla, mütləq ifadədə 304,3 milyon manat təşkil edəcək. Bu isə 2017-ci illə müqayisədə 21,8 milyon manat və 7,7 faiz çoxdur.

Mədəniyyət, incəsənət, informasiya, bədən tərbiyəsi və digər kateqoriyalara aid edilməyən sahədə fəaliyyət xərcləri üzrə ayrılan vəsaitin 127,8 milyon manatı və ya 42 faizi mədəniyyət və incəsənət sahəsində fəaliyyət xərclərinə yönəldiləcək. Cari ildə bu göstərici 120,8 milyon manat təşkil edir.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.