Bu il xalqımızın ümummilli lideri, böyük dövlət xadimi, müasir müstəqil Azərbaycanın qurucusu Heydər Əliyevin vəfatından 14 il ötür. Azərbaycan tarixindəki misilsiz xidmətləri, müstəqilliyimiz uğrunda həyata keçirdiyi genişmiqyaslı tədbirlər, xalqımızın rifahı üçün atdığı bütün addımlarla yanaşı, Ulu Öndər həm də yaddaşımızda jurnalistlərin dostu, ölkəyə rəhbərlik etdiyi dövrdə mətbuatımızın ən böyük himayədarı kimi qalıb. Ümummilli Lider hakimiyyətdə olduğu müddətdə Azərbaycanda mətbuatın inkişafına, bu sahədə maddi-texniki bazanın möhkəmləndirilməsinə və jurnalistlərin sosial müdafiəsinin gücləndirilməsinə xüsusi diqqət göstərib. Azərbaycanda söz, fikir və mətbuat azadlığının formalaşması məhz ulu öndər Heydər Əliyevin adı ilə bağlıdır.

Bu sözləri AZƏRTAC-a müsahibəsində Ümummilli Liderin xatirəsinə ehtiramını bildirmək üçün dekabrın 12-də Fəxri xiyabana gələn Azərbaycan Milli Elmlər Akademiyasının (AMEA) Rəyasət Heyəti aparatının ictimaiyyətlə əlaqələr və elmin populyarlaşdırılması idarəsinin elektron informasiya şöbəsinin rəis müavini Nərgiz Qəhrəmanova deyib.

Nərgiz Qəhrəmanova diqqətə çatdırıb ki, görkəmli siyasətçi müstəqil ölkəmizdə, sözün həqiqi mənasında, azad, xalqa xidmət edən jurnalistikanın formalaşmasına böyük töhfələr verib, mətbuatın qaldırdığı problemlərə həssaslıqla yanaşıb. Ulu Öndər hər zaman KİV-lərin cəmiyyətdə rolunu yüksək qiymətləndirib, bu sahəyə daim böyük önəm verib. Ümummilli Lider həm ölkə daxilində, həm də xaricə səfərləri zamanı onu müşayiət edən mətbuat nümayəndələrinə xüsusi diqqət ayırıb, jurnalistlərin suallarını təmkinlə və səmimi şəkildə cavablandırıb, onların fəaliyyəti ilə yaxından maraqlanıb. Məhz bu xüsusiyyətlər dahi lideri ölkə jurnalistlərinin sevimlisinə, dostuna çevirib.

“Bu gün isə ulu öndər Heydər Əliyevin siyasi kursunu onun layiqli varisi Prezident İlham Əliyev uğurla davam etdirir. Dövlətimizin başçısının mətbuat sahəsinə göstərdiyi xüsusi diqqət və qayğı, onun ölkəmizdə jurnalistlərlə bağlı problemlərin həlli istiqamətində atdığı addımlar bu istiqamətin sürətlə inkişaf etməsinə, KİV-lərin fəaliyyətinin genişlənməsinə və peşəkarlıq səviyyəsinin yüksəlməsinə səbəb olub. İnanırıq ki, mətbuatımız bundan sonra da dövlətimizin dəstəyi ilə inamlı şəkildə irəliləyəcək və daha böyük nailiyyətlər əldə edəcək”, - deyə Nərgiz Qəhrəmanova bildirib.