Azərbaycan Yazıçılar Birliyinin Xəzər bölməsi və Buzovna qəsəbəsində yerləşən Ruhulla Axundov adına Mədəniyyət Evinin birgə təşkilatçılığı ilə Yazıçılar və Jurnalistlər birliyinin üzvü, tədqiqatçı alim Hacı Soltan Əlizadənin 60 illik yubileyi qeyd edilib.

Əvvəlcə yubilyarın ömür yolu və yaradıcılığını əks etdirən qısa film nümayiş olunub.

Tədbirdə Qafqaz Müsəlmanları İdarəsinin sədri, Qafqaz Xalqları Ali Dini Şurasının sədri Şeyxülislam Allahşükür Paşazadə çıxış edərək yubilyara ürək sözlərini çatdıraraq onu təbrik edib.

Yubiley mərasimində akademik Vasim Məmmədəliyev, AMEA Milli Azərbaycan Ədəbiyyatı Muzeyinin direktoru, akademik Rafael Hüseynov, filologiya elmləri doktoru Asif Rüstəmli, Əməkdar rəssam Rafael Muradov, filologiya elmləri doktoru Firudin Qurbansoy və başqaları tədqiqatçı alimin çoxşaxəli fəaliyyətindən söhbət açıb, onun zəngin mənəviyyata malik bir insan olduğunu deyiblər.

Tədbirdə Hacı Soltan Əlizadə ədəbiyyatda göstərdiyi xidmətlərə görə türk dünyasının beynəlxalq “Qızıl ulduz” medalı və “Qızıl ürək” ordeni  ilə təltif edilib.

Ədəbi-bədii gecə bədii hissə ilə davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.