Artıq bir neçə müddətdir ki, əməkdaşlarının yubileylərini və ya yuvarlaq ad günlərini təntənəli şəkildə, bayramsayağı qeyd etmək Nizami Muzeyinin ənənəsinə çevrilmişdir. Bu gün də daha bir əməkdaşımızın – filologiya üzrə fəlsəfə doktoru İlhamə Gültekinin yuvarlaq ad gününü xüsusi karantin rejiminin qaydalarına uyğun olaraq qeyd etdik. Adətən muzeyin gözəl zallarında, rəhbərliyin, əməkdaşların iştirakı və çıxışları ilə yadda qalan ad günü mərasimlərini fərqli mənzərə əvəz etdi. Muzeyin direktoru, akademik Rafael Hüseynov təbrik üçün dəvət edilən İlhamə xanıma “Fəxri fərman” təqdim etdi və kollektiv adından təbrik məktubunu çatdırdı. Sonda bir neçə xatirə şəkli çəkildi. 

   İlhamə xanımı bir daha təbrik edir, sağlam həyat, elmi fəaliyyətində müvəffəqiyyətlər arzu edirik.

   Təbrik məktubunun mətnini və qısa video-çəkilişi diqqətinizə çatdırırıq:

Əziz İlhamə!

Bugünkü gün – aprelin 30-u hər il sənin üçün xüsusi məna daşıyır.

Bu il – 2020-ci ildə isə aprelin 30-u səninçün və səni sevən, dəyərləndirən muzey kollektivindən ötrü ikiqat əlamətdardır.

Aprelin 30-u hər il sadəcə doğum gününü bayram etsən də, bu il həmin bayramın təntənəsi bir qədər də artıb. İndiki ad günün həm də yuvarlaq ildönümündür.

Yuvarlaq ildönümləri isə bayram olmaqdan savayı həm də geriyə baxmaq, indiyədək keçdiyin yolu, yaşadığın ömrü təhlil etmək, sabahların bir az da uğurlu olması naminə daha nələri etmək barədə fikrə dalmaq fürsətidir.

Sən artıq 13 ildir ki, Nizami muzeyindəsən. Amma elə təsəvvür yaranır ki, sanki həmişə burada çalışmısan.

Bu yalnız sənin yaşıdlarının qənaəti deyil, sənin yaşın qədər iş təcrübəsi olan muzey əməkdaşları da belə düşünür.

Bu sayğını və rəğbəti qazanmaq üçünsə gərək iş yerinə və iş yoldaşlarına həmişə doğman kimi baxa biləsən.

Sən bunu bacarmısan və mükafatı da qazandığın hörmət və istəkdir.

Muzeydə çalışdığın illər boyunca sənin ən başlıca uğurlarından biri XVI yüzilin böyük Azərbaycan şairi və dövlət xadimi Məhəmməd Bayram xanın həyat və yaradıcılığı haqqında dissertasiya yazaraq uğurla müdafiə etməyin, alimlik dərəcəsi qazanmağındır.

Sən elmin daha yüksək zirvələrinə doğru inamla irəliləməkdəsən.

Sənə bu şad günündə sağlamlıq, sevinclər, ailə səadəti arzulamaqla yanaşı onu da çox gözləyir və diləyirik ki, ən yaxın illərdə başladığın yeni dissertasiyanı da müvəffəqiyyətlə yekunlaşdırasan, muzeyimizdəki elmlər doktorları sırasının daha bir cavan adla sıxlaşmasına öz töhfəni verəsən.

Ömrünün hər yeni günü doğum günün kimi gəlişi sevinclə gözlənilən, fərəhlərlə dolu olsun, daim dostlar, doğmalar əhatəsidə keçsin.

 Muzey kollektivi adından:

Akademik

Rafael Hüseynov

30 aprel 2020