Kürdəmirin Tədqiqi və Təbliğinə Dəstək İctimai Birliyi və Kürdəmir rayon Təhsil şöbəsinin birgə təşkilatçılığı ilə V.Qurbanov adına Köhnəbazar kənd tam orta məktəbinin 140 illik yubileyinə həsr olunmuş vebinar keçirilib.

Tədbirdə Köhnəbazar tam orta məktəbinin, Təhsil Nazirliyinin, Milli Məclisin, AMEA Nizami Gəncəvi adına Milli Azərbaycan Ədəbiyyatı Muzeyinin, Azərbaycan Yazıçılar Birliyinin, Azərbaycan Respublikası Təhsil İnstitutunun, AMEA-nın Tarix İnstitutunun, Kürdəmir rayon İcra Hakimiyyətinin, rayon Təhsil şöbəsinin, Kürdəmir rayon Regionlararası Mədəniyyət İdarəsinin, eləcə də bir sıra universitetlərin  nümayəndələri, həmçinin Köhnəbazar məktəbinin xarici ölkələrdə (Rusiya, Ukrayna, Türkiyə, İsveç, İngiltərə, Almaniya, Amerika və Kanada) yaşayan məzunları iştirak ediblər.

Vebinarı Kürdəmirin Tədqiqi və Təbliğinə Dəstək İctimai Birliyinin sədri, tədbirin moderatoru, professor Habil Məmmədov açıb.

Əvvəlcə Vətən uğrunda canlarını fəda vermiş şəhidlərimizin, soyqırımı qurbanlarının xatirəsi bir dəqiqəlik sükutla yad edilib.

Elmi konfransda Təhsil Nazirliyinin nümayəndəsi Əhliyyət Adıgözəlov, Kürdəmir rayon İcra Hakimiyyəti başçısının səlahiyyətlərini həyata keçirən Ağəli Kərimli, AMEA Nizami Gəncəvi adına Milli Azərbaycan Ədəbiyyatı Muzeyinin direktoru, Milli Məclisin deputatı, akademik Rafael Hüseynov, Kürdəmir rayon Təhsil Şöbəsinin müdiri Rəfail Məmmədov, Köhnəbazar kənd tam orta məktəbinin direktoru Zülfi Zahidov, Əməkdar elm xadimi Fərrux Rüstəmov, Azərbaycan Respublikası Təhsil İnstitutunun şöbə müdiri, professor İntiqam Cəbrayılov, Tarix İnstitutunun şöbə müdiri, professor Mais Əmrahov, BDU-nun kafedra müdiri, dosent Məmmədağa Baxışov, Ukrayna Kadrları İdarəetmə Regionlararası Akademiyasının professoru Azad Ömərov, Xarkov Milli Radioelektronika Universitetinin Beynəlxalq əlaqələr üzrə prorektoru, professor Murad Ömərov və digərləri çıxış ediblər. Çıxışlarda Azərbaycanda orta təhsilin tarixindən, problemlərindən bəhs olunub, Köhnəbazar kənd tam orta məktəbinin Kürdəmir rayonunda fəaliyyət göstərən orta məktəblər arasında xüsusi yer tutduğu bildirilib.

Tədbir çərçivəsində Nuralı İsmayılovun “140 yaşlı Köhnəbazar məktəbi” kitabının təqdimatı da keçirilib

Daha sonra Nuralı İsmayılov, Elnurə Eminbəyli, İntiqam Cəbrayılov, Milli Azərbaycan Ədəbiyyatı Muzeyinin Aran Regional filialının müdiri, fil.ü.f.d. Yaqut Bahadırqızı, Tofiq Abdullayev, Yadigar Təvəkkül, Şəhla Yunusova, Pənah Bəkirov, Müseyib İlyasov, Şəlalə Əbil, Badam Şirəlizadə, Ramazan Tağıyev müxtəlif mövzularda məruzələrlə çıxış ediblər.

Konfransın fəxri qonağı Azərbaycan Yazıçılar Birliyinin katibi, “525-ci qəzet”in baş redaktoru, yazıçı-publisist Rəşad Məcid çıxış edərək qocaman təhsil ocağının 140 illik yubileyinə həsr olunmuş vebinarın keçirilməsini əlamətdar hadisə adlandırıb. O, məktəbin kollektivinə və məzunlarına uğurlar arzulayıb.

Məktəbin məzunlarından - tanınmış şairə Zemfira Əliş qızı (Zərbalıyeva), Vüqar  Məmmədov (məzun, Kanada), Ülviyyə Məmmədova (Almaniya) və digərləri Köhnəbazar məktəbi və müəllimləri barədə öz xatirələrini bölüşüblər.

525-ci qəzet