Məlum olduğu kimi, ölkə Prezidenti İlham Əliyevin 2021-ci il 5 yanvar tarixli Sərəncamı ilə Azərbaycan Respublikasında 2021-ci il “Nizami Gəncəvi ili” elan olunub. Bu ədəbi hadisə klassik irsimizin dahi şəxsiyyətlərinin həyat və yaradıcılığına ölkəmizdə göstərilən diqqət və məqsədyönlü siyasətin bariz nümunəsidir.

Bu məqsədlə AMEA-nın Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran regional filialı da tədbirlər planı işləyib hazırlayıb. Tədbirlər planında nəzərdə tutulduğu kimi, Aran regional filialı il ərzində Rayon Təhsil şöbəsi ilə birlikdə “Qüvvət elmdədir! Başqa cür heç kəs, Heç kəsə üstünlük eyləyə bilməz..." devizi altında Nizami mühazirələrinin keçirilməsinə start verib. İlk mühazirə 5 may tarixində "Zoom" platforması üzərindən onlayn formatda baş tutub.

Tədbiri giriş nitqi ilə muzeyin Aran regional filialının müdiri, fil.ü.f.d. Yaqut Bahadurqızı açaraq qeyd edib ki, XII əsrdə dahi şairimiz Nizami Gəncəvi elmin insan həyatındakı əhəmiyyətini, onun yaradıcı rolunu düzgün qiymətləndirmiş, öz əsərlərində bir sıra elmi məsələlərə toxunmuşdur: "Nizami elmə, elm adamına olan müsbət münasibətini mühazirələrimizin devizi kimi qəbul etdiyimiz kəlamında layiqli şəkildə ifadə etmişdir. Mühazirələrimizin məqsədi gənc nəslin Nizami irsinə marağının artırılması, onlara şairin  yaradıcılığının bütün aspektlərinin öyrənilməsidir".

Sonra AMEA Folklor İnstitunun şöbə müdiri, filologiya elmləri doktoru Ağaverdi Xəlil “Nizami Gəncəvi yaradıcılığının folklor qaynaqları” mövzusunda məruzəsini təqdim edib. O, şairin əsərlərində Azərbaycan şifahi xalq ədəbiyyatının bütün nümunələrindən: atalar sözlərindən, məsəllərdən, əsatir və əfsanələrdən, rəvayətlərdən, nağıllardan, dastanlardan yaradıcı şəkildə istifadə etməsindən bəhs edib, ”Xəmsə”dən nümunələrlə fikirlərini təsdiqləyib.

Tədbirdə Kürdəmir rayon ümumtəhsil məktəblərinin dil-ədəbiyyat müəllimləri və Nizami yaradıcılığına maraq göstərən X-XI sinif şagirdləri iştirak ediblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.