Prezident İlham Əliyevin müvafiq Sərəncamına əsasən Azərbaycanda “Nizami Gəncəvi İli” çərçivəsində ölkəmizin hər yerində tədbirlər keçirilir. Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran regional filialı da bu məqsədlə tədbirlər planı hazırlayıb. Tədbirlər planında nəzərdə tutulduğu kimi, Aran regional filialı, Kürdəmir Rayon Təhsil Şöbəsi və Kürdəmir Regional Mədəniyyət İdarəsinin birgə təşkilatçılığı ilə “Xəmsə möcüzəsi” adlı bədii qiraət müsabiqəsi təşkil edib.

Müsabiqənin yekunu ilə bağlı keçirilmiş tədbirdə bədii qiraət müsabiqəsinin qaliblərinə hər 3 təşkilatın Fəxri fərmanları təqdim olunub.

Müsabiqə qalibləri Kürdəmir şəhər Q.Sadıqov adına Mollakənd kənd tam orta məktəbinin şagirdləri Behbud Alıyev və Səmra Muxtarova, Karrar-qəsəbə tam orta məktəbinin şagirdi Təhminə Heydərova, T.İsmayılov adına 1 saylı tam orta məktəbin şagirdi Həqiqət Məmmədova, M.Ə.Rəsulzadə adına 2 saylı məktəb-liseyin şagirdi Aydan Mənəfova və E.Ağayev adına Sor-sor kənd tam orta məktəbinin şagirdi Tamara Ədilova olublar.

Şagirdlər təşkilatçılara və onları bu müsabiqəyə hazırlayan müəllimlərə minnətdarlıqlarını bildirib, Nizami Gəncəvinin şeirlərini səsləndiriblər.

Kürdəmir şəhər 2 saylı məktəb-liseyin müəllimi Arzu Həsənova AMEA N.Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun imzaladığı Fəxri fərmana layiq görüldüyü üçün fərəh hissi keçirdiyini deyib, bundan sonra da şagirdlərdə klassik irsimizə maraq aşılayacağına səy göstərəcəyini bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.