Azərbaycanın son Qarabağ savaşında qələbəsindən, şanlı ordumuzun torpaqlarımızı düşmən işğalından azad etməsindən aylar keçsə də, zəfərimizin sevinci də, zəfərli yolumuz da, hər gün doğma Qarabağa yeni qayıdışlarımız da davam edir. Avqustun 29-da Azərbaycanın bir qrup elm, ədəbiyyat, mədəniyyət xadimlərindən ibarət nümayəndə heyətinin Şuşaya, Vaqif Poeziya Günlərinə gəlişi qələbəmizin və zəfər yolumuzun daha bir davamı, Qarabağa daha bir möhtəşəm qayıdışımız sayılmağa layiqdir.

Bunu Vaqif Poeziya Günlərinin açılışında iştirak edən Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynov bildirib.

Akademikin sözlərinə görə, azad Şuşada, Qarabağın rəmzlərindən olan Cıdır düzündə addımlamaq, böyük Vaqifin yenidən bütün əzəməti ilə yüksələn məqbərəsi qarşısında dayanmaq könüldə iftixar hissi oyadır, qəlbi qürurla doldurur. R.Hüseynov qeyd edib ki, Azərbaycan insanına bu qüruru, bu iftixarı bağışlamış, Qarabağ zəfərimizin memarı Prezident İlham Əliyev Vaqif Poeziya Günlərinin açılış mərasimində çıxış edərkən 1982-ci ili, ümummilli lider Heydər Əliyevin iştirakı ilə Molla Pənah məqbərəsinin açılışının edildiyi qarlı-sazaqlı, amma indiki avqust günləri kimi hərarətli çağları xatırlayaraq rəqəmlərin heyrətli cazibəsinə diqqət yönəltdi. Bildirdi ki, “o vaxt Vaqif türbəsinin açılışını edərkən ulu öndər Heydər Əliyevin 59 yaşı vardı, indi erməni qəsbkarlarının caynağından xilas edilərək əvvəlki gözəlliyi ilə bərpa edilmiş Vaqif məqbərəsinin yenidən açılışını keçirərkən, Vaqif Poeziya Günlərini illərin ayrılığından sonra yenidən başlayarkən mənim də 59 yaşım var”.

R.Hüseynov cənab Prezidentin bu duyğulu sözlərinin xatirəsinə başqa rəmzi "59"ları gətirdiyini vurğulayıb: “1996-cı ilin oktyabrında qədim Naxçıvan torpağında idik. 59 il ömür sürmüş dahi Hüseyn Cavidin ata-baba yurdunda təntənə ilə xatirəsi anılır, Heydər Əliyev Cavid məqəbərəsini açırdı. Həmin mərasimdə mən də çıxış etdim və söylədim ki, H.Cavid 1937-ci ilin 4 iyun gecəsində həbs edildi və o vaxtdan doğmalarından ayrıldı. İndi üzərindən düz 59 il keçərkən Cavid bu məqbərədə ailəsi ilə, əzizləri ilə qovuşur, vəfalı ömür yoldaşı Mişkinaz xanımla, sevimli oğlu Ərtoğrulla yenidən eyni tavan, eyni qübbə altında görüşür”.

R.Hüseynov əlavə edib ki, Heydər Əliyevin ictimai vicdanımız qarşısında ən müstəsna xidmətlərindən olan Cavid qayıdışının, ölməz ustadın millətinə, Vətəninə dönüşünün zirvəsi sayılmalı olan bu məqbərə sadəcə bir türbə, yalnız bir memarlıq abidəsi deyil. O, daha əvvəl Naxçıvan torpağında ucalan ən uca sərhəd dirəyimizdir.

“Eyni duyğuları mən gözəl Şuşada, Vaqif məqbərəsinin bərpadan sonrakı yeni Vaqif Poeziya Günlərinin başlanğıcında da yaşadım. Bu məqbərə də mənim düşüncəmdə yalnız abidə, türbə deyil, Şuşada, Qarabağ torpağında dikələn ən uca sərhəd dirəyimizdir”, - deyə akademik qeyd edib. Bildirib ki, yəqin 1982-ci ildə Vaqif türbəsinin ilk açılışında 59 yaşlı Heydər Əliyev də bu fikirdəymiş, yəqin 2021-ci ilin avqustunda Vaqif məqbərəsi qarşısında vüqarla dayanarkən 59 yaşlı Prezident İlham Əliyev də eyni qənaətdədir.

Sonda akademik vurğulayıb ki, ən böyük arzu, ümid, inamımız odur ki, zəfərimizin ən parlaq rəmzlərindən olan bu məqbərə, bu uca sərhəd dirəyi həmişə ucalsın, daha heç vaxt qara buludlar Qarabağa, Şuşaya, əziz Vətənimizə yaxın düşməsin.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.