Sentyabr ayının 6-da Azərbaycan cazının 80 yaşının tamam olması münasibətilə AZTV-nin Mədəniyyət kanalında “Vətənim” verilişinin Azərbaycan cazının ilk parlaq ulduzu, alt saksofonçu, cazmen Pərviz Rüstəmbəyova və cazımızın tarixinə həsr olunmuş ilk buraxılışı yayımlanıb.

Veriliş AMEA Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında nümayiş olunub.

R.Hüseynov 1980-ci illərin əvvəllərində P.Rüstəmbəyov haqqında yazdığı ilk yazılarını xatıralayıb, Azərbaycan caz və estrada musiqisinin banilərindən biri, bəstəkar Tofiq Quliyevin P.Rüstəmbəyov haqqında danışdığı xatirələrdən, 1940-cı ildə onu  öz orkestrinə dəvət etməsindən bəhs edib.  

Akademikin sözlərinə görə, iti musiqi yaddaşına malik P.Rüstəmbəyov bir çox operaları əzbər bilmişdir: “1944-cü ildə məşhur Eddi Rozner qastrolda olarkən bu istedadlı saksofonçunun ifası onu valeh etmiş və E.Rozner onu öz orkestrinə birinci saksofonçu və klarnetçi kimi dəvət etmişdir”.

R.Hüseynov 1941-ci il sentyabr ayının 6-da Azərbaycan Dövlət Cazının ilk konsertinin baş tutmasından da söz açıb. Bildirib ki, bu tarixdən milli cazımız Azərbaycan və dünya musiqisinə misilsiz töhfələr bağışlayıb. O, ilk konsertin baş tutmasında, alətlərin digər ölkələrdən alınıb gətirilməsində mədəniyyət xadimi, teatrşünas Məmmədsadıq Əfəndiyevin xidmətlərini xüsusi qeyd edib.

Bildirib ki, caz musiqiçilərinin bir çoxu kimi P.Rüstəmbəyovun da ömür yolu yarımçıq qalmış və o, cəmi 27 il ömür yaşamışdır.

Qeyd edək ki, növbəti günlərdə “Vətənim” verilişinin dəyərli sənətkar P.Rüstəmbəyova və cazımızın tarixinə həsr edilən daha 2 verilişi yayımlanacaq.