AMEA-nın Nizami Gəncəvi adına Milli Azərbaycan Ədəbiyyatı Muzeyinin Aran Regional filialının müdiri, filologiya üzrə fəlsəfə doktoru Yaqut Bahadurqızının “Ölümü ömür seçənlər” kitabının təqdimat mərasimi keçirilib.

Kitab 44 günlük Vətən müharibəsində qəhrəmancasına həlak olmuş 39 kürdəmirli şəhidin qısa, şərəfli həyatından və döyüş yolundan bəhs edir.

Tədbirin girişində Dövlət Himni səsləndirilib, ölkəmizin ərazi bütövlüyü uğrunda şəhidlik zirvəsinə ucalan qəhrəmanlarımızın xatirəsi bir dəqiqəlik sükutla yad edilib.

Tədbiri Kürdəmir Rayon İcra Hakimiyyəti başçısı vəzifəsini müvəqqəti əvəz edən Ağəli Kərimli açaraq Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə 44 gün ərzində əldə olunan möhtəşəm Qələbənin müstəqillik tariximizin ən böyük Zəfəri olduğunu söyləyib. Sentyabrın 27-dən başlayaraq cəbhə xəttində işğalçı Ermənistan ordusunun təxribatlarına cavab verən şanlı Azərbaycan Ordusunun qısa zamanda Qarabağ uğrunda başlatdığı haqq savaşını Qələbə ilə başa vurduğunu, Vətən müharibəsində qəhrəman oğullarımızın düşmənə sarsıdıcı zərbələr endirərək, ermənilərin 30 ilə yaxın işğal altında saxladıqları torpaqlarımızı azad etdiklərini bildirib.

Tədbirə onlayn qoşulan kitabın redaktoru, tarix elmləri doktoru, professor Habil Məmmədov qəhrəman şəhidlərimizin xatirəsinin əbədiləşdirilməsi istiqamətində görülən işlərdən söz açıb, şəhid məzarlarının ziyarətgaha çevrildiyini söyləyib. O, hər biri qəhrəmanlıq dastanı olan şəhidlərin həyat tarixçəsinin qan yaddaşına köçürülməsinin onlar qarşısında vətəndaşlıq borcu olduğunu qeyd edib, təqdim olunan kitabının şəhidlərin unudulmaması və gənc nəslin hərbi vətənpərvərlik ruhunda tərbiyə edilməsində faydalı olacağını vurğulayıb.

Şəhid baş leytenant Fərrux Hüseynovun atası Baxış Hüseynov, şəhid gizir Cəmil Həşimlinin anası Simuzər Bağıyeva, şəhid Ziyadxan Əliyevin anası Müşgünaz Həziyeva, Kürdəmir Regional Mədəniyyət İdarəsinin rəisi Faiq Xudanlı, Vətən müharibəsi qazisi Fariz Əzizov və digər çıxış edənlər “Ölümü ömür seçənlər” kitabının Kürdəmir şəhidlərinin xatirəsinin əbədiləşdirilməsində təqdirəlayiq addım olduğunu söyləyib, gənclərdə hərbi vətənpərvərlik ruhunun aşılanmasında əhəmiyyətini qeyd ediblər.

Yaqut Bahadurqızı əməyinə göstərilən diqqətə görə tədbir iştirakçılarına minnətdarlığını bildirib və “Ölümü ömür seçənlər” kitabını şəhid ailələrinə hədiyyə edib.

Tədbirdə şəhidlərə həsr olunan fotoslayd nümayiş olunub. Məktəblilər “Ölümü ömür seçənlər” kitabından hazırladıqları kompozisiyanı təqdim ediblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.