AMEA-nın Humanitar və İctimai Elmlər Bölməsi və Qadınlar Şurasının birgə təşkilatçılığı ilə 44 günlük Vətən müharibəsində böyük zəfərə həsr olunmuş tədbir keçirilib.

“Vətən müharibəsində Azərbaycan qadını” mövzusunda konfrans Azərbaycan Respublikasının Dövlət Himninin səsləndirilməsi ilə başlayıb.

Tədbiri AMEA-nın vitse-prezidenti, akademik İsa Həbibbəyli açaraq 44 günlük Vətən müharibəsini siyasi, diplomatik, humanitar aspektlərdən qiymətləndirib. Qeyd edib ki, Azərbaycanın tarixi qələbəsində Prezident İlham Əliyevin diplomatik məharəti, prinsipiallığı, dəqiq və məqsədyönlü siyasəti böyük rol oynayıb: “Dövlət başçısı bütün platformalarda Ermənistanın işğalçılıq siyasətinə qarşı mübarizəyə rəhbərlik etdi. Bu qələbə təsadüfi qazanılmış zəfər yox, 17 illik fəaliyyət nəticəsində düşünülmüş siyasətin əməli nəticəsidir. Azərbaycan xalqının maraqlarının qətiyyətli müdafiəsi, məqsədyönlü, ardıcıl siyasət, xalqın həmrəyliyi və Ali Baş Komandan ətrafında sıx birləşməsi nəticəsində tarixi qələbə qazanıldı”.

Akademik müharibədə qadınların rolu məsələsinə  toxunaraq, müharibəyə qadın gözü ilə baxmaq və bu mövzuda elmi-tədqiqat işlərində qadın yanaşmalarını aktuallaşdırmağın əhəmiyyətini  vurğulayıb.

Azərbaycanın şəhid həkimi, Milli Qəhrəman Gültəkin Əsgərovanın qızı Əminə Axundova anası ilə bağlı xatirələrini bölüşüb. Anasını öz peşəsini sevən, qətiyyətli həkim kimi tanıdan şəhid övladı vətənpərvərlik mövzusuna xüsusi toxunub. Həmçinin tarixi qələbədən sonra Şuşaya səfər etdiyini, o yerlərdə sanki anasıyla birgə dolaşırmış kimi hiss etdiyini söyləyib.

AMEA Qadınlar Şurasının sədri, professor Rəna Mirzəzadə isə “Xanım Mehriban Əliyevanın Qarabağın dirçəlişində humanitar missiyası” mövzusunda danışıb: “Birinci vitse-prezident Mehriban xanım Əliyevanın fəaliyyətinin əsas prinsipləri özünün elan etdiyi kimi, insansevərlik, mərhəmət, qarşılıqlı hörmətdir. Müharibənin ilk günlərindən Birinci vitse-prezident hamını həmrəyliyə, mübarizliyə çağırdı. Onun çağırışları xalqı həmrəyliyə, şanlı ordumuzu qələbəyə ruhlandırdı. Müharibədən sonra dövlət başçısı ilə Qarabağa çoxsaylı səfərlər, onun təşəbbüsü ilə keçirilən möhtəşəm “Xarıbülbül” festivalı birinci xanımın xidmətləri sırasıda xüsusi yer tutur. Mehriban xanım Əliyevanın rəhbərlik etdiyi Heydər Əliyev Fondu Vətən müharibəsi zamanı şəhid olan hərbçilərin ailəsini diqqət mərkəzində saxlayırdı, indi isə qazilərimizin müalicə və reabilitasiya məsələlərinə xüsusi qayğı ilə yanaşılır”.

AMEA Rəyasət Heyəti aparatının Elmi irs şöbəsinin müdiri, t.e.d. Zemfira Hacıyeva “Azərbaycan qadını İkinci Dünya müharibəsi illərində” mövzusunda çıxışında keçmiş SSRİ-nin tarixi qələbəsində Azərbaycan övladlarının, iqtisadi resurslarının əhəmiyyətini rəqəmlərlə, tarixi faktlarla səsləndirib, bu işdə fərqlənən müxtəlif peşə sahibi Azərbaycan qadınlarının adlarını sadalayıb.

AMEA Qadınlar Şurası İdarə Heyətinin üzvü, fəl.e.d. Ziba Ağayeva isə “Vətən müharibəsində qadınlar” mövzusunda çıxışında qadının inkişaf və sülhlə assosiasiyalaşmasını nəzərə çatdırıb, qadının müharibədə qələbəyə ruhlandıran, yaraları bağlayan xidmətlərinə xüsusi diqqət çəkib.

Tədbirdə AMEA Rəyasət Heyəti aparatının Doktorantura sektorunun müdiri, b.ü.f.d., dosent Tubuxanım Qasımzadə “Azərbaycan qadını və hərbi iş”, Nizami Gəncəvi adına Ədəbiyyat İnstitutunun baş elmi işçisi Mərziyyə Nəcəfova “Poeziyamızın Qarabağ savaşı - Vətən müharibəsi” mövzularında çıxış ediblər.

Ədəbiyyat İnstitutunun şöbə müdiri, f.e.d., professor Vüqar Əhməd şeirin, sənətin müharibədən əvvəlki dövrdə, eləcə də müharibə ərzində xalqda yaratdığı böyük ruh yüksəkliyindən danışıb.

Tədbir akademik İsa Həbibbəylinin yekun nitqi ilə başa çatıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.