Dekabrın 30-da Nizami muzeyində bu qurumun əməkdaşları – Mədəni irs və mənbəşünaslıq şöbəsinin elmi işçisi  Aygün Şəfiyeva və muzeyin  Qadınlar Təşkilatının sədri, Ekspozisiyanın qorunması, izahı və audio müşaiyətin təmini şöbəsinin böyük elmi işçisi, filologiya üzrə fəlsəfə doktoru Sevinc Heydərovanın yuvarlaq ildönümləri qeyd edilib.

Tədbiri giriş sözü ilə açan muzeyin baş direktoru, akademik Rafael Hüseynov ilk növbədə muzey əməkdaşlarını qarşıdan gələn yeni il və dünya azərbaycanlılarının həmrəylik günü münasibətilə təbrik edib, onlara möhkəm can sağlığı, xoşbəxtlik arzulayıb.

 Akademik “Nizami ili” çərçivəsində muzeydə görülən işləri vurğulayaraq dahi şairin şöhrətini dünyada daha artıq tanıtmaq yolundakı uğurlardan bəhs edib.

 Rafael Hüseynov qeyd edib ki, 2021-ci il Azərbaycanın qazandığı böyük zəfərin ilk ildönümü kimi tarixə yazıldısa, işğaldan azad olunmuş torpaqlarda yeni həyat qurmaq səmtindəki fəaliyyət, qarşıdan gələn illərdə daha əzəməti olacaq.

Akademik cari ilin son günlərində muzeydə qeyd olunan yubiley tədbirlərinə diqqəti yönəldərək Nizami muzeyinin iki xanım  əməkdaşı - Aygün Şəfiyevanın altmış,  Sevinc Heydərovanın əlli yaşını bütün muzey əməkdaşları adından təbrik edib.

Direktor bildirib ki, muzeyin “Sözümüz” adlanan növbəti ildönümü ünvanları məhz Aygün xanımın və Sevinc xanımın yuvarlaq ildönümlərinə həsr olunub və bütün muzey əməkdaşlarının ürək sözlərini, səmimi təbriklərini əhatə edir.

Daha sonra Rafael Hüseynov təbriknamələri yubilyarlara təqdim edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.