23-24 dekabr tarixlərində Bakı Dövlət Universitetində “Böyük Azərbaycan şairi Nizami Gəncəvi və Qərb-Şərq ədəbi-mədəni irsi” mövzusunda beynəlxalq elmi konfrans keçirilib.

Bakı Dövlət Universiteti və M.Lomonosov adına Moskva Dövlət Universitetinin Bakı filialının təşkilati dəstəyi ilə gerçəkləşən elmi konfransda AMEA Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynov və muzeyin Qədim və Orta əsrlər Azərbaycan ədəbiyyatının tədqiqi və təqdimi şöbəsinin elmi işçisi Gülnar Əqiq iştirak etmişlər.

Akademik Rafael Hüseynov beynəlxalq elmi konfransın plenar iclasında “Nizami Gəncəvinin böyük Azərbaycan və görkəmli dünya şairi olmasını şərtləndirən amillər və meyarlar” mövzusunda məruzə ilə çıxış etmişdir.

Alim çıxışında qeyd edib ki, Nizami Gəncəvi həm öz əsrində, həm də sonrakı bütün yüzillərdə fasiləsiz olaraq ən yaxşıların ən yaxşısı mərtəbəsində qalmış, istisnasız olaraq bütün təzkirəçilər də, ayrı-ayrı dövrlərin kamil şeir biliciləri də onu şairlərin sərvəri saymışlar. Bildirilmişdir ki, Nizami Gəncəvi lap başlanğıcdan milli şair olmaqla yanaşı, bütöv regionun, oçağkı mədəni aləmin baş və ortaq şairi olmaq vəzifəsini də öhdəsinə götürmüşdü.

Azərbaycanın və dünyanın mötəbər elm mərkəzlərinin təmsil olunduğu konfransda akademik Rafael Hüseynovun elmi redaktorluğu ilə 2021-ci ildə ilk sayı işıq üzü görmüş “Şərqşünaslıq” jurnalı da iştirakçılara təqdim edilib. Jurnalın elmi ictimaiyyət üçün əhəmiyyətindən bəhs edən Rafael Hüseynov cari  sayın Nizami Gəncəviyə həsr olunduğunu vurğulayıb və dərginin gələcəkdə şərqşünaslıq elminin aktual problemlərini işıqlandıracağını qeyd edib.

Nizami muzeyinin elmi işçisi Gülnar Əqiq konfransın bölmə iclasında “Nizami Gəncəvi Şərq ədəbiyyatında lirik-fəlsəfi janrın banisi” mövzusunda məruzə ilə çıxış edib.

Beynəlxalq elmi konfransda Tacikistan Milli Elmlər Akademiyası, Tatarıstan Kazan Dövlət Mədəniyyət İnstitutu, Özbəkistan, Türkiyə və digər  ölkələrin elm, təhsil müəssisələrinin alimləri iştirak etmişlər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.