Yanvarın 31-də AMEA Nizami Gəncəvi adına Milli Azərbaycan Ədəbiyyatı Muzeyində 2 fevral Respublika Gənclər Gününün 25-ci ildönümünə həsr olunmuş ədəbi-bədii tədbir keçirilib.

"Daim yeni üfüqlərə doğru” adlanan tədbiri muzeyin baş direktoru, akademik Rafael Hüseynov giriş sözü ilə açaraq qeyd edib ki, tarixin bütün dövrlərində və bütün dünya ölkələrində gənclik sabaha ümid yeri olub.

Akademik, böyük filosof-şair Hüseyn Cavidin “Azər” poemasındakı gəncliyə inam ideyasına müraciət edərək “Bu əsərdə gəncliyə həm inam var idi, həm də yeni nəslin bəzən keçmiş  nəsillərin getdiyi yoldan fərqli cığırlarla irəliləməsinə anlaşıqlı yanaşma var idi. Bu yolla Cavid gəncliyin irəliləməsinə, daha xoş günlər üçün zirvələrə çatmasına münasibət bildirirdi” – deyə qeyd edib.

Rafael Hüseynov çıxışında diqqətə çatdırıb ki, XX əsrdə də, XXI əsr içərisində də gənclik Azərbaycanın irəliləməsi üçün çox böyük işlər görərək aparıcı qüvvəyə çevrilib. Bütün Azərbaycan tarixinin ən mürəkkəb düyünü olmuş Qarabağ düyünü yalnız yeni zaman içərisində həllini tapıb və bu düyünün açılmasında da, Azərbaycanın qazandığı zəfərlərdə də ən vacib sözü gənclik deyib.

Bildirilib ki, XX əsrin yetişdirdiyi görkəmli Azərbaycan alimlərinin əksəriyyətinin qiymətli elmi əsərləri məhz gənclik çağının məhsulu olmuş, məhz gənc yaşlarda bu alimlərin böyük hissəsi siyasi repressiyalara qurban getmişlər.  

Rafael Hüseynov çıxışında Azərbaycan təhsilinin tarixi təşəkkül yoluna da nəzər salaraq sovet hakimiyyəti illərində azərbaycanlı gənclərin ittifaqın müxtəlif ölkələrində təhsil almaq imkanının çətinliklərindən bəhs edib. O, qeyd edib ki, yalnız ulu öndər Heydər Əliyevin zəhmətləri sayəsində Azərbaycanın istedadlı gəncləri Moskva, Sankt-Peterburq, Ukrayna, Baltikyanı ölkələrinin  aparıcı təhsil müəssisələrində vacib elmlərə yiyələnə bilirdilər. Məhz həmin elmi gənclik 1990-cı illərdə Azərbaycan öz dövlət müstəqilliyini yenidən elan edərkən ölkə üçün böyük bir sərvətə çevrildilər, ölkədə yeni və mühüm ixtisas sahələrinin formalaşması və inkişafı üçün bünövrə rolunu oynadılar.

Alim qeyd edib ki, bu gün ölkəmizdə təhsil sahəsində üfüqlər daha genişdir. Müasir Azərbaycan gəncliyi dünyanın bir çox ölkələrində, ən yüksək təhsil müəssisələrində təhsil almaq imkanına malikdir. Ölkənin parlaq gələcəyi də məhz belə zəkaların yetişməsindən, zirvələr fəth etməsindən  asılıdır.

Muzeyin Gənc Alim və Mütəxəssislər Şurasının təşkilatçılığı ilə keçirilən tədbirdə muzeyin “Yeni və müasir Azərbaycan ədəbiyyatının tədqiq və təqdimi” şöbəsinin laborantı Turanxanım Hümbətovanın “Mən gəncliyəm”, muzeyin doktorantı Murad Həsənlinin “Yeni bəşəri çağırışlarla səsləşən gənclik”, mövzusunda məruzələri də dinlənilib.

Daha sonra tədbir bədii hissə ilə davam edib. Üzeyir Hacıbəyli adına Bakı Musiqi Akademiyasının Orta ixtisas musiqi-məktəb studiyasının şagirdi Teymur Kazımov konsert proqramı ilə çıxış edib.

Sonda muzeyin Gənc Alim və Mütəxəssislər Şurasının elmi və ictimai fəaliyyətlərinə görə fərqlənən bir qrup üzvünə diplom və sertifikatlar təqdim olunub.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.