AMEA-nın Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialı tərəfindən Azərbaycan dramaturgiyasının banisi, böyük mütəfəkkir, materialist filosof, ictimai xadim Mirzə Fətəli Axundzadənin anadan olmasının 210 illiyinə həsr edilmiş tədbir keçirilib.

Tədbiri giriş söz ilə açan muzeyin Aran Regional filialının müdiri, filologiya üzrə fəlsəfə doktoru Yaqut Bahadurqızı dahi mütəfəkkirin zəngin yaradıcılıq yolundan və Azərbaycan ədəbiyyatına bəxş etdiyi dəyərli sənət əsərlərindən söz  açıb. O, eyni zamanda Şərq və Qərb ədəbiyyatına və mədəniyyətinə yaxşı bələd olan və bəzi əsərlərində bu iki mədəniyyətin sintezini həyata keçirən M.F.Axundzadənin dramaturgiyamızın inkişafındakı rolundan bəhs edib. T.Bahadurqızı ədibi Azərbaycan ədəbiyyatının nadir simalarından biri kimi səciyyələndirərək, milli dramaturgiyamızın və realist nəsrin banisi kimi M.F.Axundzadənin ədəbiyyat tariximizdə misilsiz xidmətlər göstərdiyini bildirib.

Sonra M.F.Axundzadənin həyat və yaradıcılığını əks etdirən videoçarx nümayiş etdirilib.

Tədbirdə Muğanlı kənd tam orta məktəbinin dil-ədəbiyyat müəllimi Afaq İbişova “M.F. Axundzadənin həyat və yaradıcılığı” mövzusunda məruzə ilə çıxış edib. Məruzəçi şeir, nəsr, dram fəlsəfəsi – nəzəri traktatlar müəllifi olan M.F.Axundzadənin sözü və əməli bir sənətkar kimi dövrün ictimai-siyasi həyatını düzgün qiymətləndirdiyini, onun bir ədib, şair olmaqdan daha artıq bir cəmiyyətçi, bir əməlpərvər olduğunu vurğulayıb.

Daha sonra Muğanlı kənd tam orta məktəbin şagirdləri dahi mütəfəkkirin “Sərgüzəşti Mərdi-Xəsis (Hacı Qara)” və “Hekayəti Müsyö Jordan Həkimi-Nəbatat və Dərviş Məstəli Şah Cadükuni Məşhur” komediyalarından kiçik parçalar nümayiş etdirib, şeirlərindən nümunələr səsləndiriblər.

Həmçinin rayon ziyalısı Namiq Ağayev, Muğanlı kənd tam orta məktəbin direktoru Nurəddin Aslanov çıxış edərək belə tədbirlərin keçirilməsinin gənc nəslin klassik irsə, ədəbiyyatımıza marağının artırılmasında və onlarda səhnə mədəniyyətinin formalaşmasında mühüm əhəmiyyət kəsb etdiyini bildiriblər.

Sonda tədbirdə iştirak edən şagirdlərə Milli Azərbaycan Ədəbiyytı Muzeyinin baş direktoru, akademik Rafael Hüseynovun imzaladığı Fəxri fərmanlar təqdim edilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.