AMEA Nizami Gəncəvi adına Milli Azərbaycan Ədəbiyyatı Muzeyində müasir dövr Azərbaycan ədəbiyyatının görkəmli nümayəndələrindən biri olan Mirvraid Dilbazinin 110 illik yubileyinə həsr olunmuş elmi seminar məşğələsi keçirilib.

Tədbirdə zəngin bədii irs yaradıcısı, Azərbaycanın ilk qadın Xalq şairi Mirvarid Dilbazi əsərlərində qadın, ana xisləti və bu qəhrəmanların ifadə etdiyi mərdlik, cəsarət, zəka kimi bədii xüsusiyyətlər araşdırmaya cəlb olunub.  

Məruzəçi – muzeyin Ədəbi mərasimlər və nəşrlər şöbəsinin böyük laborantı, doktorant Rəhilə Sadıqova Mirvarid Dilbazini ilk növbədə Azərbaycan uşaq ədəbiyyatının istedadlı nümayəndəsi kimi təqdim edib. Daha sonra şairənin əlvan mövzu palitrasına malik bədii yaradıcılığında Azərbaycan qadınının təsviri, tərənnümü məsələsinə diqqət yetirilib. Bildirilib ki, əsərlərinin böyük qismində müəllif ən aydın və qüvvətli sözlərlə canlı lövhələr, inandırıcı qadın obrazları yaratmışdır. Bu qadın qəhrəmanlar mərd, vətənpərvər, təəssübkeş, incə ruhlu, lakin möhkəm xarakterli insan obrazlarını təmsil edir.

Rəhilə Sadıqova şairənin yetmiş illik yaradıcılıq yolunun əsas bədii qayəsini təşkil edən milli qadın, müdrik ana idealını onun “Aişənin anası” (1930), “Bolşevik Zeynəb” (1933), “Məhsəti” (1945),  “Əlcəzairli qız ”(1961) və digər poemalarının, şeirlərinin təhlili ilə təsbit edərək gəldiyi nəticələri irəli sürüb.

Elmi seminar məşğələsində muzeyin Mədəni irs və mənbəşünaslıq şöbəsinin müdiri, filologiya elmləri doktoru, professor Xatirə Bəşirli, Ekspozisiyanın qorunması, izahı və audio müşaiyətin təmini şöbəsinin müdiri Tomiris Babanlı, Qədim və orta əsrlər Azərbaycan ədəbiyyatının tədqiqi və təqdimi şöbəsinin elmi işçisi Gülnar Əqiq və digərləri çıxış ediblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.