16 Fevral tarixindən etibarən Bakı Dövlət Universitetinin Şərqşünaslıq fakültəsinin Fars filologiyası və regionşünaslıq bölmələri və Bakı Slavyan Universitetinin Tərcümə, Filologiya fakültələrinin tələbələri AMEA Nizami Gəncəvi adına Milli Azərbaycan Ədəbiyyatı Muzeyində istehsalat təcrübəsi keçirlər.
   Təcrübə müddətində tələbələrin vaxtının səmərəli təşkil olunması və yeni biliklərin əldə olunması məqsədilə muzeyin “Təhsil” şöbəsi tərəfindən müxtəlif mövzularda seminar məşğələləri keçirilir, ekskursiyalar təşkil olunur.
   Belə seminar məşğələlərindən bir neçəsi “Akademik yazı qaydaları”, “Jurnalların elektron arxivinin yaradılması” mövzularına həsr olunmuşdur. Məruzəçilər – muzeyin Gənc Alim və Mütəxəssislər Şurasının sədri Dilbər Hüseynova və sədrin müavini Gülsəba Həsənova çıxışlarında elmi yazıların strukturunun tərtib olunma qaydaları, mənbələrə istinad, o cümlədən, elmi məqalələrin yazılma qayda və prinsipləri və s. haqqında ətraflı məlumat vermişlər.
   Sonrakı günlərdə tələbələr Nizami muzeyinin ekspozisiya zallarını ziyarət etmiş, Azərbaycan ədəbiyyatının görkəmli nümayəndələri, ədəbi dövrlər haqqında izahatları dinləmişlər. Muzeyin geniş ekspozisiyası üzrə müxtəlif - ərəb (Rəhilə Sadıqova, Natəvan Bağırova), Azərbaycan (Mehriban Vəliyeva) , fars (Gülnar Əqiq, Aysel Bayramova, Nərmin Əliyeva), ingilis (Tomiris Babanlı, kulturologiya üzrə fəlsəfə doktoru Nailə Əliyeva, Aymən Həsənova, Nəzrin Yusifova) dillərində aparılan ekskursiyalar maraqla qarşılanmışdır.
    Nizami muzeyində təhsildən əlavə məlumatların qazanılması və əldə edilən biliklərin tətbiqi üçün Bakı Dövlət Universiteti və Bakı Slavyan Universiteti tələbələri ilə aparılan təcrübə məşğələləri 27 may tarixinədək davam edəcək.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.