5 aprel 2022-ci il tarixində AMEA Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran regional filialı tərəfindən türk şairi, yazıçı, rəssam, ssenarist və dramaturq, ictimai xadim, Beynəlxalq Sülh Mükafatı laureatı  Nazim Hikmətin 120 illik yubileyinə həsr olunmuş tədbir keçirilib.

Tədbiri giriş söz ilə açan muzeyin Aran Regional filialının müdiri, filologiya üzrə fəlsəfə doktoru Yaqut Bahadurqızı türk inqilabi poeziyasının banisi Nazim Hikmətin müstəmləkə siyasətinə qarşı çıxdığına, kommunizmi təbliğ etdiyinə görə ömrünün çox hissəsini həbsxana və sürgünlərdə keçirtdiyini deyib, onun qürbətdə keçən həyatından, fərqli düşüncə tərzindən, ziddiyyətli və məşəqqətli bioqrafiyasından bəhs edib.

Sonra görkəmli türk şairi Nazim Hikmətin həyat və yaradıcılığını əks etdirən qısa videoçarx və şairin ssenarisi əsasında çəkilən “Bir məhəlləli iki oğlan” bədii filmindən epizod nümayiş olunub.

“Nazim Hikmətin həyatının Bakı dönəmi” mövzusunda məruzə  ilə çıxış edən şair-publisist, ədəbiyyatşünas, Prezident təqaüdçüsü Ramil Əhmədov şairin ilk kitabı “Günəşi içənlərin türküsü”nün Bakıda nəşrindən, onun Azərbaycanın tanınmış ədəbiyyat, mədəniyyət xadimləri ilə əlaqələrindən və Nazim Hikmətin azərbaycanlı tədqiqatçılarından danışıb, böyük türk şairinin yaradıcılığında Bakı dövrünün əhəmiyyətindən, şairin Bakıya olan bağlılığından söhbət açıb.

Daha sonra  tədbirə onlayn qoşulan Azərbaycan Yazıçılar Birliyinin Gənclər Şurasının sədri, AMEA N.Gəncəvi adına Milli Azərbaycan Ədəbiyyatı Muzeyinin dissertantı Fərid Hüseyn “Nazim Hikmətin şəxsiyyətindən doğan poetik dünyagörüşü” adlı məruzəsində şairin keçdiyi həyat yolunun onun düşüncəsinə, yaradıcı psixologiyasına təsirindən və bütün bunların ədibin fəaliyyətində əksi məsələlərindən danışıb. Eyni zamanda, Nazim Hikmət şeirinin sonradan Türkiyə ədəbiyyatında nə üçün ədəbi məktəb yaratmasından danışıb. F.Hüseyn şairin yaradıcılığının həm ənənəvi şeir, həm də avanqard poeziyanın qovşağında yaranmasının səbəblərindən də bəhs edib.

Tədbirdə “Nazim Hikmətin ideoloji mübarizəsi” adlı məruzəsini təqdim edən Milli Azərbaycan Ədəbiyyatı Muzeyinin dissertantı Ülviyyə Yusifova Nazim Hikmətin komunist ideologiyası uğrunda apardığı mübarizələri və ideallarına olan sədəqətini xüsusi qeyd edib.

Filialın əməkdaşı Tofiq Abdullayev isə çıxışında Azərbaycanın görkəmli sənətkarı, Əməkdar Mədəniyyət İşçisi Aşıq Şakir Hacıyevlə Nazim Hikmətin Moskva şəhərində görüşündən bəhs edən bir xatirəni tədbir iştirakçıları ilə bölüşüb.

Sonda Sahilə Müseybova və qiraətçi Ərəstun Sadıqov şairin şeirlərindən nümunələr səsləndiriblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.