7-8 aprel tarixlərində Rusiyanın Sankt-Peterburq şəhərində yerləşən “Ermitaj" muzeyində ənənəvi “Muzey və mədəni turizm problemləri” mövzusunda dəyirmi masanın növbəti toplantısı keçirilib. Sayca iyirminci olan dəyirmi masanın bu dəfəki “Mədəni iqtisadiyyat aynasında muzey və mədəniyyət turizmi” mövzusu ətrafında mühazirələr dinlənilib, müzakirələr aparılıb.

Bir çox ölkələrin - İtaliya, Rusiya, Qazaxıstan və s. nümayəndələrinin də iştirak etdiyi hibrid formada keçirilən beynəlxalq tədbirdə AMEA Nizami Gəncəvi adına Milli Azərbaycan Ədəbiyyatı Muzeyinin əməkdaşı - Beynəlxalq əlaqələr və dünya muzeyləri şöbəsinin müdiri, kulturologiya üzrə fəlsəfə doktoru Nailə Əliyeva da iştirak edib.

Muzeyin əməkdaşı Nailə Əliyeva  tədbirə onlayn qoşularaq “Sergey Yesenin adına Rusiya-Azərbaycan ədəbi əlaqələr mərkəzinin (Nizami Gəncəvi adına Milli Azərbaycan Ədəbiyyatı Muzeyinin filialının) 2020-ci  ildə fəaliyyəti” adlı məruzə ilə  çıxış edib.

Nailə Əliyeva ümumilikdə rus ədəbiyyatının Azərbaycanda muzey səviyyəsində təmsil olunduğu və əsasən Sergey Yeseninin həyat və yaradıcılığını əks etdirən muzeyin gördüyü işlərdən söz açmış, əvvəllər Sergey Yeseninin ev-muzeyi kimi fəaliyyət göstərən filialın 2010-cu ildən Rusiya-Azərbaycan ədəbi əlaqələr mərkəzinə çevrildiyini qeyd etmişdir. Məruzəçi mərkəzin son illər Rusiya muzeyləri ilə qarşılıqlı əməkdaşlığının genişləndiyini də dəyirmi masa iştirakçılarının diqqətinə çatdırıb. Mühazirə böyük maraqla qarşılanıb və sonra Nailə Əliyeva dəyirmi masa iştirakçılarının suallarını cavablandırıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.