Mayın 16-da Mədəniyyət kanalında yayımlanan “Vətənim” verilişinin növbəti buraxılışı el müdriki Bəhlul Danəndəyə həsr olunub.

Veriliş AMEA-nın Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynovun təqdimatında yayımlanıb. Alim proqramda Yaxın Şərq xalqlarının, eləcə də Azərbaycanın folklorunda xüsusi yeri olan tarixi şəxsiyyət Bəhlul Danəndənin həyatı və yaradıcılığı haqqında məlumat verib.

Akademik R.Hüseynov qeyd edib ki, IX əsrdə Bağdadda yaşamış Bəhlul Danəndə böyük hökmdar, xəlifə Harun-ər-Rəşidin doğma qardaşı idi. Bəhlul olduqca gözütox, hər zaman gerçəkləri danışan, haqpərəst, məzlumlara dayaq duran bir insan olduğundan taxt-tacdan könüllü imtina etmişdi. Qardaşı xəlifə Harun-ər-Rəşid Bəhlula dəfələrlə vəzifə təklif etsə də, o, hakimiyyətdən uzaq qaçırdı. Sözün düzünü demək lazım gəldikdə özünü bilərəkdən dəliliyə vurduğuna görə ona bəzən Divanə Bəhlul da deyirdilər. O, hətta xəlifə qardaşının da nöqsanlarını deməkdən çəkinmirdi.

“Bəhlul Danəndə cəmiyyətdə səliqə-sahman yaradan xalq nəzarətçisi kimi idi. Sözünü deməyi bacaran belə dikbaşlara, diribaşlara cəmiyyətin hər zaman ehtiyacı olub. Onlar olmayanda belə xalq həmin insanları rəvayət, əfsanə və nağıllarda yaşadıb”, – deyə bildirən R.Hüseynov Bəhlul haqqında yayılmış rəvayətlərdən, qələmə alınmış əsərlərdən söz açıb.

Alimin sözlərinə görə, güldürərək düşündürən Bəhlulun sözlərində təbəssüm və təfəkkür hər zaman yanaşı olub. Onun adı ilə bağlı olan lətifə, söyləmə və rəvayətləri oxuduqca Bəhlulun həqiqətən də uzaqgörən müdrik insan olduğunun fərqinə varmaq mümkündür.

R.Hüseynov qeyd edib ki, orta əsrlərdə Azərbaycan və İran şəhərlərində dini və əxlaqi işlərə nəzarət edən dövlət məmurunu möhtəsib adlandırırdılar. O dövrün insan hüquqları üzrə müvəkkili olan möhtəsiblər xalqın haqqını müdafiə edirdilər. Bu vəzifə də məhz Bəhlul Danəndə kimi mənəviyyatı zəngin şəxsiyyətlərin qismətinə yazılmışdı. Xalq hər zaman belə müdrik insanlara dərin hörmət bəsləmiş, minnətdar olmuşdur.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.