İyulun 7-də Azərbaycan Radiosunda “Axşam görüşləri” proqramının Azərbaycanlı müğənni, xanəndə və pedaqoq, Azərbaycan SSR Xalq artisti İslam Rzayevə həsr edilən növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynovun təqdimatında yayımlanan verlişdə İslam Rzayevin ömür yoluna nəzər salınıb, onun zəngin yaradıcılığı haqqında ətraflı məlumat verilib.

Rafael Hüseynov bildirib ki, İslam Rzayevdən öncə Azərbaycanın 2 məşhur oxuyan İslamı olmuşdur. Onlardan biri adı seygaha qovuşmuş xanəndə İslam Abdullayev, digəri isə Aşıq İslam Yarpızlı idi. Onun sözlərinə görə, tale Azərbaycanın səs kitabına daha bir məlahətli avaz sahibi, Qarabağlı müğənni İslam Rzayevin də adını yazıbmış.

Qeyd olunub ki, əslən Füzuli rayonunun Sərdarlı kəndindən olan İslam Rzayevdəki işığı ilk görən və muğam dünyasının sirli aləminə yollarını açan onun Asəf Zeynallı adına musiqi ocağındakı müəllimi Seyid Şuşinski olmuşdur. İslam Rzayev Seyid Şuşinskinin sinifində muğam dəstgahlarını mükəmməl öyrənmiş, həmçinin Zülfü Adıgözəlovdan və Həqiqət Rzayevadan muğam dərsləri almış, sənətini təkmilləşdirmişdir: “Elə bu səbəbdəndir ki, 1956-cı ildə 22 yaşındaykən orta ixtisas musiqi məktəbini bitirəndə artıq İslam Rzayev yetişmiş xanəndə idi. Bir qədər sonra, 1958-ci ildə isə o, Azərbaycan Dövlət Akademik Filarmoniyasına tərddüdsüz işə götürüldü və ömrünün sonunadək, düz 50 il flarmoniyanın solisti oldu”.

Akademik Rafael Hüseynov İslam Rzayevin Parisdə tarzən, Xalq artisti Hacı Məmmədov və kaman ustadı, Xalq artisti Habil Əliyevla ifasından da söhbət açıb. Bildirib ki,  xanəndənin 73 illik ömrü boyunca dünyanın müxtəlif ölklərində möhtəşəm səhnə uğurları olub. Üç böyük sənətkarın Parisdə bir-birlərini tamamlayan məftunedici ifaları isə bir sənət möcüzəsi idi.

İslam Rzayevin xalq musiqisi ifaçıları arasında ən seçilənlərdən biri olduğunu deyən Rafael Hüseynov onun 1967-ci ildə Əməkdar artist, 1989-cu ildə Xalq artisti fəxri adlarına layiq görüldüyünü diqqətə çatdırıb.

Bildirilib ki, muğam, təsnif, xalq mahnılarından başqa, İslam Rzayev Cahangir Cahangirov, Səyid Rüstəmov, Əhsən Dadaşov kimi Azərbaycan bəstəkarlarının bəstələrini də böyük məharətlə oxumuşdur.

Qeyd olunub ki, İslam Rzayevin təşəbbüsü ilə 1989-cu ildə Bakıda ilk Dövlət Muğam Teatrı yaradılmışdır. O, həyatının sonunadək Muğam Teatrının bədii rəhbəri vəzifəsində çalışmışdır.

Akademik Rafael Hüseynov Əməkdar incəsənət xadimi, rejissor Arif Qazıyevin  1967-ci ildə “Şur” muğamı əsasında çəkdiyi 28 dəqiqəlik filmi də xatırladıb. Bildirib ki, filmdə bir sıra böyük sənətkalarla yanaşı, İslam Rzayevin də ifası əks olunub. “İslam Rzayevdən bugünə və sabaha saxlanc olan ifaları dinləyərkən bütün ömrü boyu musiqimizə, mədəniyyətinə fədakarlıqla xidmət etmiş böyük xanəndənin surəti gözlərimiz önündə canlanacaq”, - deyə Rafael Hüseynov bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.