AMEA Gəncə Bölməsində ulu öndər Heydər Əliyevin ilk dəfə hakimiyyətə gəlişinin 50 illiyinə həsr olunan “Heydər Əliyev: gender bərabərliyi və qadınlar elmdə” mövzusunda dəyirmi masa keçirilib.

 AMEA-nın Qadınlar Şurasının dəstəyi ilə keçirilən tədbirdə akademiyanın institut, elmi idarə və mərkəzlərinin qadınlar şuralarının sədrləri, gəncəli qadın alimlər iştirak ediblər. Dəyirmi masada Ümummilli liderin elmə verdiyi qiymət, gender bərabərliyi və qadınların elmə töhfələrindən danışılıb.

Gəncə Bölməsinin işlər müdiri Rasim Tağıyev dəyirmi masada qadınların elmdə əldə etdiyi uğurlardan söz açıb. O, AMEA-nın prezidenti, akademik Akif Əlizadənin rəhbərliyi ilə gender bərabərliyi və qadınların elmdə roluna həsr edilən belə ənənəvi dəyirmi masaların Ulu Öndərin qadın siyasətinin daha dərindən öyrənilərək tədqiq və təbliğində əhəmiyyətini vurğulayıb. Tədbirdə AMEA-nın Qadınlar Şurasının sədri, fəlsəfə üzrə elmlər doktoru, professor Rəna Mirzəzadə “Heydər Əliyev: gender bərabərliyi və qadınlar elmdə” mövzusunda məruzə elə çıxış edib. O, ulu öndər Heydər Əliyevin gender bərabərliyinin dövlət tərəfindən daim diqqət mərkəzində saxlanılması üçün gördüyü işlərdən danışıb, müasir cəmiyyətimizdə gender zorakılığı hallarının qarşısının alınmasında dahi rəhbərin müdrik siyasətini xüsusi qeyd edib. Bildirib ki, məhz həmin uzaqgörən siyasət nəticəsində cəmiyyətimizdə gender zorakılığı hallarının qarşısı alınıb, kişilərlə yanaşı, qadınlar üçün də bərabər hüquqlar təmin edilib. Bu gün Azərbaycan qadınlarının ictimai-siyasi, mədəni həyatda rəhbər vəzifələrə təyin edilmək imkanları genişləndirilib, onların elmi-tədqiqat və təşkilati işlərə daha geniş cəlb olunması öz sanballı nəticələrini verib. Elmdə artıq qadın hərəkatı formalaşmağa başlayıb. Bütövlükdə akademiyada çalışanların 60 faizdən çoxu qadınlardır. Onlar artıq görünməyə, sözlərini deməyə, təşkilatlanmağa başlayıblar. Bu da onlara stimul verir.

Dəyirmi masada AMEA-nın Qadınlar Şurasının sosioloji xidmət qrupunun rəhbəri Mahrux Nəcəfli çıxış edərək ümummilli lider Heydər Əliyevin qadınlara həssas diqqət və qayğısından danışıb, Ulu Öndərin “Azərbaycan qadınlarının rolunun artırılmasına dair tədbirlər haqqında” Sərəncamını bu qayğının təzahürü kimi dəyərləndirib, bu siyasi xəttin Prezident İlham Əliyev tərəfindən uğurla davam etdirildiyini vurğulayıb.

AMEA Fizika İnstitutunun Qadınlar Şurasının sədri, akademiyanın müxbir üzvü, professor Səlimə Mehdiyeva, AMEA Rəyasət Heyətinin “Elmi irs” Mərkəzinin direktoru, professor Zenfira Hacıyeva, Radiasiya Problemləri İnstitutunun direktoru, professor Rəvan Mehdiyeva, Nizami Gəncəvi adına Ədəbiyyat İnstitutunun Qadınlar Şurasının sədri, dosent Aynur Xəlilova, Dilçilik İnstitutunun şöbə müdiri Sevil Zülfüqarova, Nizami Gəncəvi adına Milli Azərbaycan Ədəbiyyatı Muzeyinin Qadınlar Şurasının sədri, filologiya üzrə fəlsəfə doktoru Sevinc Heydərova və AMEA Qadınlar Şurasının sədr müavini Ruhəngiz Əliyeva çıxış edərək 2000-ci ildə Azərbaycan Prezidenti tərəfindən imzalanmış “Azərbaycan Respublikasında dövlət qadın siyasətinin həyata keçirilməsi haqqında” Fərmanın qadınların cəmiyyətdəki rolunun daha da gücləndirilməsində, xüsusilə onların elmi axtarışlara daha geniş cəlb olunmasında əhəmiyyətini qeyd ediblər.

Dəyirmi masada Milli Məclisin deputatı Pərvin Kərimzadə ulu öndər Heydər Əliyevin qadın siyasətinin bu gün də uğurla davam etdirildiyini vurğulayıb, Prezident İlham Əliyevin rəhbərliyi ilə müvafiq istiqamətdə həyata keçirilən tədbirlərin hər bir Azərbaycan vətəndaşında, o cümlədən qadınlarda xüsusi qürur hissi oyatdığını deyib.

AMEA Gəncə Bölməsinin Diyarşünaslıq İnstitutunun Tarix şöbəsinin müdiri, professor Həsənbala Sadıxov, institutun elmi katibi Mətanət Əliyeva və başqaları çıxış edərək akademik Akif Əlizadənin təşəbbüsü ilə regionlarda belə silsilə tədbirlərin keçirilməsini bölgələrdə çalışan elm adamlarına diqqət və qayğının təzahürü kimi dəyərləndiriblər.

Dəyirmi masada Gəncə Bölməsinin “Elm” nəşriyyatında Ulu Öndərin ilk dəfə siyasi hakimiyyətə gəlməsinin 50 illiyi münasibətilə nəşr etdiyi yeni kitabın məziyyətlərindən söhbət açılıb.

Tədbir çərçivəsində AMEA Gəncə Bölməsinin 7 nəfər üzvü olan qadın təşkilatı yaradılıb. Qeyd olunub ki, ilyarım öncə AMEA-nın Rəyasət Heyətinin qərarı ilə Qadınlar Şurası təsis edilib. Bundan sonra akademiyanın bütün institutları, bölmələri və mərkəzlərində bu şuralar qadın təşkilatları formasında təsis olunub. Əsas məqsəd müxtəlif məsələlər üzrə Rəyasət Heyətinə dəstək göstərməkdir. Milli Məclisin üzvü Pərvin Kərimzadə AMEA Gəncə Bölməsi Qadınlar Təşkilatının fəxri üzvü seçilib.

Jurnalistlərlə söhbət zamanı Radiasiya Problemləri İnstitutunun Qadınlar Şurasının sədri, professor Rəvan Mehdiyeva deyib ki, qadınların elmdə olan çətinliklərinin və qarşıya çıxan problemlərinin həlli üçün belə bir təşkilatın olması çoxdan lazım idi. “Biz belə bir təşkilatın bölgələrdə də yaradılması qərarına gəldik. İlk olaraq Gəncədən başladıq. Bunun əsas səbəblərindən biri AMEA-nın Gəncə Bölməsinin kifayət qədər böyük kollektivinin olması və ilk demokratik respublikanın Gəncədə fəaliyyətə başlamasıdır”, - deyə professor Rəvan Mehdiyeva qeyd edib.

Dəyirmi masanın iştirakçıları tədbirdən sonra Gəncənin görməli yerlərini gəzib, Cavad xanın məqbərəsi, “İmamzadə” memarlıq kompleksini ziyarət ediblər.