Dekabrın 14-də AMEA Nizami Gəncəvi adına Milli Azərbaycan Ədəbiyyatı Muzeyinin Elmi şurasının cari il üçün sonuncu hesabat iclası keçirilib.  

İclasda muzeyin Elmi şurasının üzvləri ilə yanaşı, Humanitar və İctimai Elmlər Bölməsinin nümayəndəsi kimi AMEA-nın müxbir üzvü Ərtegin Salamzadə də iştirak edib.

Muzeyin direktoru, akademik Rafael Hüseynov toplantını giriş sözü ilə açaraq, 2020-ci ilin Azərbaycan üçün xüsusi əlamətdar il olduğunu vurğulayıb: “Qarabağın işğaldan azad edilməsi təkcə Azərbaycanda deyil, həm regionda, həm də dünyada siyasi, mənəvi situasiyanı kökündən dəyişəcək. Ən yaxın zamanda biz Şuşadakı filialımızı da bərpa edəcəyik. İşğaldan azad edilmiş ərazilərimiz təzə həyat qazanacaq. Qarabağın və ümumiyyətlə Azərbaycanın xoşbəxt günləri hələ qarşıdadır.”

Akademik Rafael Hüseynov bildirib ki, 2020-ci ildə 80 illik yubileyinin qeyd olunması haqqında ölkə Prezidentinin 10 fevral 2020-ci il tarixli sərəncamını əsas tutaraq AMEA Nizami Gəncəvi adına Milli Azərbaycan Ədəbiyyatı Muzeyində bir çox işlər yerinə yetirilib. Bu işlər sırasında muzeyin 80 illik yubileyi ilə əlaqədar kütləvi tirajla “Nizami Muzeyi – yaddaş körpüsü” adlı plakatın buraxılmasını, şərəfli yolun bütün dövr və mərhələlərini özündə əks etdirən 80 lövhəli yubiley sərgisinin hazırlanmısını qeyd etmək olar.

Muzeyin direktoru, həmçinin yubiley tədbirləri silsiləsinə daxil olan film çəkilişlərindən də bəhs edib. Bildirib ki, Azərbaycan Televiziyasının Bədii və sənədli filmlər studiyası xətti ilə Nizami muzeyinə həsr olunmuş “Söz məbədi” adlı iki hissəli sənədli-publisistik film çəkilib, filmin “Nizaminin salamı” adlı birinci hissəsi oktyabrın 5-də, “Yaddaş körpüsü” adlı ikinci hissəsi isə oktyabrın 6-da AZTV-nin Mədəniyyət kanalında nümayiş etdirilib.

Bundan əlavə, muzeyin yubileyinə həsr olunmuş “Söz məbədi” adlı mahnının (söz: akademik Rafael Hüseynov, musiqi: bəstəkar Rizvan Sədirxanov) yazılması da yubiley ilinə hədiyyələr sırasındadır.

Daha sonra muzeyin elmi işlər üzrə direktor müavini fil.e.d., professor Xatirə Bəşirli il ərzində muzeydə görülən digər işlər barədə iclas iştirakçılarına məlumat verib.

Məruzəçi qeyd edib ki, cari ilin yanvar-mart ayları ərzində muzeyə müxtəlif ölkələrdən 965 qonaq gəlib, muzeyin ekspozisiyası üzrə cəmi 230 izahat aparılıb (Azərbaycan dilində 115, rus dilində 49, ingilis dilində 36, ərəb dilində 25, fars dilində 5 izahat).

Bildirilib ki, COVID-19 pandemiyası səbəbilə il ərzində ölkə muzeylərinə tamaşaçı ziyarətinə ciddi məhdudiyyətlər qoyulub. Mövcud vəziyyətlə əlaqədar muzeydə “Nizami Muzeyində sizinlə” adlı layihə hazırlanıb, 5 dildə - Azərbaycan, rus, ingilis, fars və ərəb dillərində çəkiliş həyata keçirilərək video-ekskursiyalar formatında muzeyin Youtube kanalında və rəsmi nizamimuseum.az saytında yerləşdirilib.

X.Bəşirli əlavə edib ki, hesabat ilində muzeydə 2 problem üzrə ümumilikdə 12 mövzu, 15 iş 12 mərhələdə yerinə yetirilib. Cari ildə 5 kitab çap etdirilib, 9 kitab redaktə olunaraq nəşr edilib. Muzey əməkdaşlarının müxtəlif elmi məcmuələrdə, qəzet və jurnallarda ümumilikdə 153 məqaləsi dərc olunub. Əməkdaşlar hesabat ilində muzeydə və muzeydən kənar 63 elmi konfrans və simpoziumlarda məruzələrlə çıxış ediblər.  

Çap edilən nəşrlər arasında müasir müstəqil Azərbaycan dövlətinin quruculuğunda və inkişafında müstəsna xidmətləri olan iki görkəmli şəxsiyyətin Ulu öndər Heydər Əliyev və Azərbaycan Respublikasının Prezidenti İlham Əliyevin vətən və xalq qarşısında misilsiz xidmətləri fonunda dövlətimizin XX əsrin sonu və XXI yüzilin ilk onilliklərində keçdiyi çətin və mübarizələrlə dolu yoldan bəhs edən “Böyük yolun həqiqəti” (Rafael Hüseynov. Bakı, “Elm və təhsil” nəşriyyatı. 2020) kitabı mühüm nəticələr sırasında qeyd edilib.

Diqqətə çatdırılıb ki, muzeyin yubileyi ilə əlaqədar nəzərdə tutulmuş “Klassik Azərbaycan ədəbiyyatı və incəsənətinin milli özünütəsdiqdə və Mərkəzi Asiyadakı mədəni tərəqqidə yeri” adlı beynəlxalq konfransın materialları da nəşr olunub. 

Bundan əlavə, Nizami Muzeyinin fəaliyyət göstərdiyi illər ərzində toplanmış tamaşaçı rəyləri əsasında “Səksən ilin güzgüsü. Rəylər, təəssüratlar, dəyərləndirmələr”. (Redaktor və "Ön söz"ün müəllifi akademik Rafael Hüseynov, Bakı, “Elm və Təhsil”, 2020) adlı kitab işıq üzü görüb.

İclasda, həmçinin muzeyin beynəlxalq əlaqələrindən də bəhs olunub. Bildirilib ki, muzeyin kollektivi bu ilin 27 sentyabr tarixindən etibarən Ermənistan silahlı qüvvələrinin cəbhə xəttində hərbi təxribat törətməsi, Azərbaycanın yaşayış məntəqələrini, o cümlədən Azərbaycanın ikinci böyük şəhəri olan Gəncəni raket atəşlərinə tutması, ağır artilleriya atəşləri nəticəsində dinc sakinlərin həlak olması, eləcə də müxtəlif tikililərə, maddi-mədəni irs nümunələrinə ziyan dəyməsi və işğalçı dövlətin yeni təhdidləri ilə bağlı dünya muzeylərinə müraciət yayıb. 10 dildə tərtib edilmiş müraciət dünyanın 300-dək tanınmış muzeyinə ünvanlanıb.

Daha sonra muzeyin filiallar üzrə hesabatını Xaqani Şirvani adına Aran regional filialının müdiri, fil.ü.f.d. Yaqut Əşrəfova diqqətə çatdırıb.

Sonda hesabat ətrafında geniş müzakirələr aparılıb və muzeyin fəaliyyəti qənaətbəxş hesab edilib. 

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.