AMEA Nizami Gəncəvi adına Milli Azərbaycan Ədəbiyyatı Muzeyində istehsalat təcrübəsində olan  ali məktəb tələbələri ilə 19 apreldə növbəti elmi seminar məşğələsi keçirilib.

Bakı Slavyan Universitetinin tələbələri bu dəfəki məşğələdə “Elmi əsərlərin struktur tərtibi qaydaları” məruzəsi və dünya ədəbiyyatı araşdırmaları silsiləsindən  “Qacarlar dövründə ədəbiyyatın inkişafı” mövzusunda çıxışları dinləyiblər.

İlk məruzəçi – muzeyin “Ədəbi mərasimlər və nəşrlər” şöbəsinin elmi işçisi Təranə Rüstəmova tələbələrə elmi yazıların struktur tərtibi qaydaları haqqında geniş məlumat verib, Azərbaycan Milli Kitabxanası ilə iş və qaynaqların elektron qaydada sifarişi, əldə olunması yollarını izah edib.

Bakı Slavyan Universitetinin tələbələrinə Nizami muzeyində müxtəlif filoloji ixtisaslar üzrə aparılan elmi fəaliyyət haqqında da məlumat verilmiş, dünya ədəbiyyatı üzrə araşdırmalardan olan “Qacarlar  dövründə ədəbiyyatın inkişafı” məruzəsi dinlənilmişdir.

Məruzəçi – muzeyin “Qədim və orta əsrlər Azərbaycan ədəbiyyatının tədqiqi və təqdimi şöbəsinin” elmi işçisi Gülnar Əqiq qeyd etmişdir ki, tariximizdə silinməz izlər qoymuş qəhrəman türk tayfalarından  biri də Qacarlar tayfası idi. Bildirilib ki, 1797-ci ildə Ağa Məhəmməd şahın  Şuşada qətl edilməsindən sonra taxta çıxmış Qacarlar süalaləsinin ikinci hökmdarı Fətəli şahın (1797-1834) 37 ilədək davam edən   hakimiyyət illəri  ədəbiyyatın, xüsusilə də poeziyanın inkişafında yeni bir mərhələ hesab edilmişdir. “Xaqan” təxəllüsü ilə şeirlər yazan  Fətəli şahın dövründə Qacarlar sarayında “Əncümən-i Xaqan” adlı ədəbi məclis fəaliyyət göstərmiş, dövrün əsas ədəbi simalarını öz ətrafına toplamışdır.

Gülnar Əqiq onu da vurğulayıb ki, araşdırmalar zamanı mənbələrdə ədəbi-bədii yaradıcılıqla məşğul olan yüzdən artıq Qacar şahzadəsinin olduğu müəyyən edilmiş, şahın qız övladları və xanımları arasından da şairlər yetişmişdir.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.