AMEA-nın Humanitar Elmlər Bölməsinin Elmi şurasının iclası keçirilib.

Tədbiri AMEA-nın vitse-prezidenti, Humanitar Elmlər Bölməsinin Elmi şurasının sədri, akademik İsa Həbibbəyli açaraq gündəlikdə qoyulan məsələlər barədə məlumat verib.

Akademik İsa Həbibbəyli Azərbaycanın opera müğənnisi, mahir təsnif ifaçısı, musiqi folkloru tədqiqatçısı, Azərbaycan professional vokal sənətinin banisi, SSRİ xalq artisti, professor Bülbülün (Murtuza Məşədi Rza oğlu Məmmədov) anadan olmasının 125 illiyi ilə əlaqədar Humanitar Elmlər Bölməsinin qərarı ilə Tədbirlər planının icra olunduğunu diqqətə çatdırıb. Bülbülün yubileyi münasibətilə Elmi şuranın iclasında AMEA-nın Memarlıq və İncəsənət İnstitutunun Muğamşünaslıq şöbəsinin müdiri, sənətşünaslıq elmləri doktoru, professor Sevil Fərhadovanın “Bülbülün yaradıcılıq yolu Şərq və Avropa mədəniyyətlərinin sintezinin məhsulu kimi” mövzusunda məruzəsi dinlənilib, dahi sənətkarın ifasında Üzeyir Hacıbəylinin “Sənsiz” romansı səsləndirilib.

İclasda AMEA-nın Nəsimi adına Dilçilik, Məhəmməd Füzuli adına Əlyazmalar institutlarının, Hüseyn Cavidin Ev Muzeyinin Elmi şurasının tərkibində dəyişiklik edilməsi məsələləri müzakirə edilib. Məhəmməd Füzuli adına Əlyazmalar İnstitutunun Kitabxanaşünaslıq, biblioqrafiya­şünas­lıq və kitabşünaslıq ixtisasından fəlsəfə doktoru hazırlığı üzrə doktorantı Dünya Məmmədlinin elmi rəhbərinin dəyişdirilməsi məsələsinə baxılıb.

Azərbaycan dramaturgiyasının banisi, yazıçı-dramaturq, filosof, ictimai xadim Mirzə Fətəli Axundzadənin anadan olmasının 210 illiyinin qeyd edilməsi haqqında AMEA Humanitar Elmlər Bölməsi Elmi şurasının Tədbirlər planı müzakirəyə təqdim edilib. Tədbirlər planına əsasən Mirzə Fətəli Axundzadənin 210 illik yubileyi münasibətilə Elmi seminarın (Şəki Regional Elmi Mərkəzi, Humanitar Elmlər Bölməsi) və Mirzə Fətəli Axundzadənin 210 illiyinə həsr olunmuş elmi konfransın (Nizami Gəncəvi adına Ədəbiyyat İnstitutu), “Mirzə Fətəli Axundovun şəxsi arxivi” (Məhəmməd Füzuli adına Əlyazmalar İnstitutu), “Mirzə Fətəli Axundzadə yaradıcılığında folklor motivləri və mifologizmlər” (Folklor İnstitutu), “Mirzə Fətəli Axundzadə - 210: əlifba, orfoqrafiya, dram və nəşr dili məsələləri” (Nəsimi adına Dilçilik İnstitutu), “Azərbaycan ədəbi və mədəni düşüncəsində Mirzə Fətəli Axundzadə ilə başlanan yeni istiqamətlər” (Nizami Gəncəvi adına Ədəbiyyat İnstitutu) mövzusunda tədbirlərin keçirilməsi nəzərdə tutulub. “Mirzə Fətəli Axundov Ensiklopediyası”nın,  “Mirzə Fətəli Axundov. Həyatı və yaradıcılığı” (“Sənətkarın elmi pasportu” seriyasından) kitabının hazırlanıb nəşr edilməsi, Mirzə Fətəli Axundzadənin əsərləri, haqqında yazılmış kitablardan ibarət sərginin təşkili barədə elmi tədqiqat müəssisələrinə müvafiq tapşırıqlar verilib.

Elmi şuranın sədri, akademik İsa Həbibbəyli 2022-ci ilin 24 oktyabr tarixində dahi şair və dramaturq Hüseyn Cavidin anadan olmasının 140 illiyinin tamam olduğunu xatırladıb. Alim, Hüseyn Cavidin həyat və yaradıcılığının tədqiqi və  təbliği istiqamətində AMEA-nın Hüseyn Cavidin Ev Muzeyində, eləcə də HEB-in digər elmi müəssisələrində görülən işlər barədə ətraflı məlumat verib, ədibin 140 illiyi münüsibətilə Humanitar Elmlər Bölməsinin Tədbirlər planına dair elmi şura üzvləri ilə müzakirələr aparıb. İclasda “Hüseyn Cavidin sənəti: ideallar və müasir dövr” mövzusunda beynəlxalq elmi konfransın (Nizami Gəncəvi adına Ədəbiyyat İnstitutu, Hüseyn Cavidin Ev Muzeyi), Hüseyn Cavidin 140 illiyinə həsr olunmuş respublika elmi konfransının  (AMEA Naxçıvan Bölməsi, AMEA Humanitar Elmlər Bölməsi) və  “Hüseyn Cavid və mifoloji düşüncə” mövzusunda elmi konfransın keçirilməsi (Folklor İnstitutu), “Hüseyn Cavid Ensiklopediyası”nın, “Hüseyn Cavidin fəlsəfi irsinin tədqiqi”, “Hüseyn Cavid və sənəti”, “Hüseyn Cavidin “Azər” poeması”, “Hüseyn Cavidin linqvopoetikası” monoqrafiyalarının, “Hüseyn Cavidin Ev Muzeyinin izahlı kataloqu”nun (3 cilddə), AMEA Naxçıvan Bölməsinin “Elmi əsərlər” jurnalının Hüseyn Cavidin xatirəsinə həsr olunmuş xüsusi buraxılışının hazırlanması və nəşri,  dahi yazıçı və darmaturqun həyatı və yaradıcılığına dair materialların KİV-də işıqlandırılması barədə HEB-in Tədbirlər planının təsdiq edilməsi haqqında qərar qəbul edilib.

Elmi şuranın iclasında görkəmli ədəbiyyatşünas alim, Əməkdar elm xadimi, AMEA-nın müxbir üzvü Azadə Rüs­tə­movanın anadan olmasının 90 illik yubileyi ilə əlaqədar AMEA Rəyasət Heyəti qarşısında vəsatət qaldırılıb. Bu münasibətlə “Elm fədaisi. Azadə Rüstəmova – 90” (nəşrə hazırlayanı filologiya elmləri doktoru, professor Fəridə Əzizova) kollektiv məqalələr və xatirələr toplusunun hazırlanıb nəşr edilməsi və təqdimat mərasiminin keçirilməsi barədə Nizami Gəncəvi adına Ədəbiyyat İnstitutuna müvafiq tapşırıqlar verilib.

Elmi şuranın sədri, akademik İsa Həbibbəyli HEB-in elmi müəssisələrində türk xalqları ədəbiyyatının tədqiq edilməsi istiqamətində görülən işlərdən bəhs edib, 2022-ci ilin sentyabr ayının 27-də qazax ədəbiyyatının görkəmli nümayəndəsi Muxtar Auezovun anadan olmasının 125 illiyi ilə əlaqədar müvafiq tapşırıqlar verib. Həmçinin, humanitar sahədə fəaliyyət göstərən tanınmış alimlərin yubileylərinin HEB-in elmi şuralarının iclaslarında nəzərə alınması barədə tövsiyələrini bildirib.

Elmi şuranın iclasında bir sıra kadr məsələlərinə baxılıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.