Xurşidbanu Natəvanın özbək dilində tərcümə edilmiş kitabının təqdimatı olub + Foto
Okt 07, 2022 | 10:32 / Yeni nəşrlər
VIII Bakı Beynəlxalq Kitab Sərgisi çərçivəsində Özbəkistandakı Heydər Əliyev adına Azərbaycan Mədəniyyət Mərkəzinin layihəsi ilə özbək dilinə tərcümə olunmuş Azərbaycanın tanınmış şairi Xurşidbanu Natəvandan bəhs edən kitabın təqdimatı keçirilib.
"Xurşidbanu Natəvan. "Günəşə çatar başım" seçilmiş əsərləri" adlı kitab Nizami Gəncəvi adına Milli Azərbaycan Ədəbiyyatı Muzeyində dizayn edilərək çapa hazırlanıb. Muzeyin baş direktoru, akademik Rafael Hüseynovun “Ön söz” yazdığı kitab “Şuşa İli” münasibətilə nəşr edilib.
Təqdimat mərasimində Azərbaycan Mədəniyyət Mərkəzinin direktoru Samir Abbasov, Milli Azərbaycan Ədəbiyyatı Muzeyin baş direktoru, akademik Rafael Hüseynov və özbək şairə Xosiyat Rüstəm çıxış ediblər.
Bildirilib ki, nəşrdə Xurşidbanu Natəvanın əsərləri həm Azərbaycan, həm də özbək dilində təqdim olunur. Bundan başqa, şairənin irsi, əl işləri, çəkdiyi rəsmlər kitabda öz əksini tapıb. Kitabı özbək dilinə özbəkistanlı şairə Şəhla Qasımova tərcümə edib.
Akademik Rafael Hüseynov qeyd edib ki, Xurşidbanu Natəvanın irsi bu kitabda ilk dəfə geniş həcmdə bədii tərcümədə təqdim olunur. Yeni nəşr ədəbiyyatşünas alimlər, tədqiqatçılar, kitabxanaçı-biblioqraflar və geniş oxucu kütləsi üçün nəzərdə tutulub.
O, Prezident İlham Əliyevin Xurşidbanu Natəvanın 190 illik yubileyinin qeyd edilməsi ilə bağlı Sərəncamına uyğun olaraq ölkənin müxtəlif təhsil, elm, mədəniyyət ocaqlarında silsilə tədbirlərin keçirildiyini vurğulayıb.
Natəvanın zəngin yaradıcılığı, ömür yolu və şəxsiyyəti haqqında söz açan akademik Rafael Hüseynov bildirib ki, Qarabağ xanlığının sonuncu varisi Xurşidbanu Natəvanın bədii istedada və qabaqcıl ideyalara malik söz sənətkarı kimi ədəbiyyat tariximizdə xüsusi yeri var. Alim qeyd edib ki, Qarabağ xanlığının varislərindən olub vətəni Şuşada “Xan qızı” adı ilə məşhur olan Xurşidbanu, aşiqanə-hüznlü şeirlər, təbiət təsvirləri və müasirlərinə ünvanladığı mənzumələri ilə sevilən, keşməkeşli tale yolu keçmiş qadın şairlərimizdəndir.
© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.
