Azərbaycanın Xalq artisti, xanəndə Canəli Əkbərovun vəfatından bir il ötür.

Bu münasibətlə Canəli Əkbərovun yaxınları, dostları, mədəniyyət nümayəndələri II Fəxri xiyabanda mərhumun məzarını ziyarət edib, önünə gül dəstələri qoyublar.

Mərasimdə çıxış edən nazir Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynov Azərbaycan musiqi mədəniyyətinin tanıdılmasında böyük xidmətləri olan Canəli Əkbərovun yaradıcılığından söhbət açıb. Bildirib ki, görkəmli xanəndə mənalı musiqimizin, opera sənətimizin inkişafına töhfə verən sənətkarlardan olub. Qeyd edib ki, muğamın sirlərini atasından öyrənən Canəli Əkbərov mükəmməl musiqi təhsili almış, Seyid Şuşinski və Xan Şuşinski kimi ustad sənətkarlardan dərs almışdı.

Ustad sənətkarla bağlı xatirələrini bölüşən akademik Rafael Hüseynov onunla tanışlığının yetmişinci illərin sonlarına təsadüf etdiyini bildirib. Qeyd edib ki, Canəli Əkbərov ömrü boyu məhəbbətlə yaşamışdı. Azərbaycan xalqına, muğamata, doğulub boya-başa çatdığı cənub diyarına sevgisi ona daim ruh verirdi: "Canəlinin sinə daşına “Mən muğama xidmət etdim, muğam da mənə şöhrət və şərəf gətirdi” sözləri həkk olunub. Doğrudur, məcazi və gerçək mənada muğama gətirdiyi şöhrət və şərəf Azərbaycanın ən ali ordenləri olaraq onun döşündən asıldı. Nə qədər ki, əlimdə qələm və deyən dilim olacaq Canəli Əkbərovun əbədiyaşar sənətinə xidmət edəcəyəm. Çalışaq ki, Canəli Əkbərovun cismani yoxluğunu hiss etməyək".

Daha sonra Canəli Əkbərovun “Leyli Məcnun” tamaşasına hazırladığı sonuncu Leylisi, Xalq artisti Gülyaz Məmmədova, tələbələri - Hüseyn Məlikov, Sərxan Mirzəyev, Məftun Səfərli, Bəhruz Usubov, Vüsal Qasımov və Məhəmməd İbrahimov müəllimləri Canəli Əkbərovun ciddi və tələbkar pedaqoq olması ilə yanaşı, eyni zamanda, tələbələri ilə qayğıkeş, mehriban rəftarı, səmimi tələbə-müəllim münasibəti yaratmaq bacarığını vurğulayıblar.

Mərasimdə Xalq artistinin sənət dostlarından - Hacı Aqil Məlikov, Ağasəlim Abdullayev, Razi Şükürov, Təhmiraz Şirinov, Qəzənfər Abbasov, Vidadi Paşayev, Firuz Əliyev, Teyyub Aslan, Zakit Məmmədov, sənətşünaslıq üzrə fəlsəfə doktoru Səadət Təhmirazqızı, poliqrafçı alim Şəddat Cəfərov, professor İbrahim Quliyev, naşir-jurnalist Hacı Mehman Fərzullayev, Xan Şuşinskinin oğlu Aslan Cavanşirov, “Respublika” qəzetinin cənub bölgəsi üzrə müxbiri Əlisəfa Həsənov, “Söz” jurnalının baş redaktoru Sevda Əlibəyli böyük sənətkarın yaradıcılığından söz açıb, onunla bağlı xatirələrini bölüşüblər.
Sonda Canəli Əkbərovun ailə üzvləri adından qardaşı Tərlan Əkbərov və kürəkəni Nurəddin Salayev çıxış ediblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.