Nizami Gəncəvi adına Milli Azərbaycan Ədəbiyyatı Muzeyinin baş direktoru akademik Rafael Hüseynov və muzeyin bir qrup əməkdaşı Bakı Dövlət Universitetinin Şərqşünaslıq fakültəsinin 100 illik yubileyinə həsr olunmuş “Azərbaycan şərqşünaslığı Şərq-Qərb elmi-mədəni və ictimai-siyasi kontekstində” mövzusunda beynəlxalq konfransda iştirak edib.

Konfransın açılış mərasimində çıxış edən akademik Rafael Hüseynov Şərqşünaslıq fakültəsinin keçdiyi yüz illik yolun Azərbaycanın ictimai-siyasi və mədəni həyatında qoyduğu izlərin əhəmiyyətindən söz açıb, vaxtilə fakültənin ilk dekanı Panteleymon Juzenin rəhbərliyi ilə təsis edilmiş  Şərqşünaslıq fakültəsində dünya şərqşünaslıq məktəbinin yetirmələri – akademik N.Y. Marr, İ.Y. Kraçkovski, N.İ. Aşmarin, A.A. Ramaskeviç, İ.İ. Meşşaninov kimi məşhur alimlərin dərs dediyini, sonradan fakültədə Ələsgər Məmmədov, Mübariz Əlizadə, Rəhim Sultanov kimi azərbaycanlı şərqşünas alimlərin formalaşdığını və onların yetişdirdiyi mütəxəssislərin bu gün də respublikamızın elmi mühiti üçün gərəkli kadrlar olduğunu qeyd edib.

Akademik Rafael Hüseynov BDU-nun Şərqşünaslıq fakültəsinin Şərq və Qərb mədəniyyətlərarası dialoqun inkişafında özünəməxsus yeri olduğunu vurğulayaraq, gələcəkdə də bu elm və təhsil ocağının Şərq və Qərbin vəhdətinə öz töhfələrini verəcəyini bildirib.

Tədbirdə muzeyin Komparativistika və bədii tərcümə şöbəsinin müdiri, filologiya elmləri doktoru Şəfəq Əlibəyli “Farsdilli poeziyada bədii ifadə vasitəsinin semantik-konstruktiv diapazonu” və muzeyin Ədəbi mərasimlər və nəşrlər şöbəsinin baş elmi işçisi filologiya elmləri doktoru, professor Aida Qasımova ““Biz gündüzlər sultanınız, gecələr dostunuzuq” Orta əsr ziyalısı və hakim dairələr (Əbu Hayyən ət-Tauhidi örnəyi)” mövzusunda məruzələrlə çıxış ediblər.

Konfransın müvafiq panel iclaslarında muzeyin əməkdaşları – filologiya üzrə fəlsəfə doktoru Nərmin Əliyevanın “Hürriyyət və gözəllik şairi Həbib Sahir”, filologiya üzrə fəlsəfə doktoru Gülnar Əqiqin “Azərbaycan maarifçiliyinin Şərq bədii-fəlsəfi fikrinə təsiri”, Natəvan Bağırovanın “Seyfəddövlənin saray şeirində bədii ənənələr”, Aysel Bayramovanın “Müasir İran mühacir şairi Fateme Extesari”, Rəhilə Sadıqovanın “Min bir gecə nağıllarının Azərbaycan ədəbiyyatında təzahürü” mövzularında məruzələri  dinlənilib. 

İki gün davam edən beynəlxalq tədbirdə iştirak edən muzey əməkdaşları sertifikatlarla təltif ediliblər.

Qeyd edək ki, Bakı Dövlət Universitetinin və Beynəlxalq Türk Mədəniyyəti və İrsi Fondunun  təşkilatçılığı ilə baş tutan konfransda Türkiyə Cümhuriyyəti, Özbəkistan Qırğızıstan, Qazaxıstan, Polşa, Macarıstan və digər ölkələrdən nümayəndələr iştirak ediblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.