Nizami Gəncəvi adına Milli Azərbaycan Ədəbiyyatı Muzeyində Azərbaycanın mühacirət həyatı yaşayan ədibləri haqqında növbəti seminar məşğələsi keçirilib. Muzeydə istehsalat təcrübəsi keçən Bakı Dövlət Universitetinin tələbələri seminarın əsas dinləyiciləri olublar. Məruzəni muzeyin Yeni və müasir Azərbaycan ədəbiyyatının tədqiqi və təqdimi şöbəsinin elmi işçisi Töyrəxanım Hüseynova təqdim edib. “Milli söz xəzinəmizin zəngin qolu” adlı məruzədə tələbələrə “mühacirət” sözünün lüğət mənası və “mühacirət ədəbiyyatı” anlayışı izah edilib. Daha sonra məruzəçi Azərbaycan mühacirət ədəbiyyatının tarixi keçmişi və XX əsr mühacirət ədəbiyyatının nümayəndələrinin həyatı, fəaliyyəti və yaradıcılığı haqqında maraqlı məlumatlar çatdırılıb.

Məruzəçi qeyd edib ki, “zaman-zaman mühacirət ədəbiyyatı yad, özgə sayılsa da, tarix vahid mənəviyyatın tərkib hissəsi kimi ona bəraət verdi və Məhəmməd Əmin Rəsulzadə yaradıcılığı olmadan çağdaş Azərbaycan ədəbiyyatını, taleyüklü ictimai-siyasi hadisələri anlayıb dərk etmək mümkün deyil. Əlibəy Hüseynzadənin əsərlərini incəliyi ilə öyrənmədən Azərbaycan mənəviyyatını anlamaq qeyri-mümkündür.”

T.Hüseynova onu da dinləyicilərin diqqətinə çatdırıb ki, “Almas İldırımın, Kərim Yaycılının və Alazan Baycanın poetik irsi, Abay Dağlının dramaturji fəaliyyəti, Səməd Ağaoğlunun, Məhəmməd Əsədbəyin və Ümmülbanunun (Baninin) parlaq nəsr yaradıcılığı; Əhmədbəy Ağaoğlu, Əlimərdan bəy Topçubaşov, Mirzə Bala Məmmədzadə, Əhməd Cəfəroğlu, Ceyhun Hacıbəyli, Hüseyn Baykara, Əbdülvahab Yurdsevər və başqalarının tənqid, ədəbiyyatşünaslıq və publisistika sahəsindəki uğurları, azərbaycançılığa xidmətləri Azərbaycan mühacirətinin zəngin ədəbi irsi haqqında aydın təsəvvür yaradır.”

© Bütün hüquqlar qorunur. Xəbərlərdən istifadə edərkən www.nizamimuuseum.az saytına istinad zəruridir.