Azərbaycan xalqının qəhrəmanlıq tarixinə əbədi həkk olunmuş Qarabağ uğrunda Vətən müharibəsinin növbəti ildönümü Nizami Gəncəvi adına Milli Azərbaycan Ədəbiyyatı Muzeyində anım tədbiri ilə qeyd olunub.

27 sentyabrda baş tutmuş sessiyanı muzeyin direktoru akademik Rafael Hüseynov giriş nitqi ilə açaraq XX əsr boyu Azərbaycan xalqının Ermənistan və erməniçiliyə havadarlıq edən qüvvələr vasitəsilə dəfələrlə işğal, deportasiya və ən müxtəlif işgəncələrə məruz qaldığını qeyd edib. Akademik 1905-1907-ci illər, 1918-1920-ci illərin dəhşətli soyqırım faktlarını diqqətə çatdırararq bu qanlı hadisələrin Bakıda, Azərbaycanın dörd bir bucağında, o cümlədən, Cənubi Azərbaycanda da törədildiyini vurğulayıb.

Rafael Hüseynov 1920-1930-cu illərdə sovet təhlükəsizlik və asayiş orqanlarında kök salmış erməniçiliyin indi də siyasi repressiyalar yolu ilə Azərbaycan xalqının ən seçmə insanlarını necə məhv etməsi barədə məlumat verib. Bildirilib ki, sovet xalqlarını birləşdirən Böyük Vətən müharibəsi bitdikdən sonra ermənilər Qərbi Azərbaycan ərazisində yaşayan azərbaycanlıları öz tarixi torpaqlarından didərgin salmaq üçün kütləvi depoertasiya siyasətini yeritmiş və 1948-ci ildə məqsədlərinə nail olmuşlar.

Daha sonra akademik qeyd edib ki, 1980-ci illərin sonunda soydaşlarımızın acınacaqlı vəziyyətdə  məruz qaldıqları deportasiya və məcburi köçkünlük faciəsi Azərbaycan xalqına qarşı törədilən qanlı cinayətlərin ən yüksək mərhələsi idi.

Bildirilib ki, 2020-ci ilin noyabrında Azərbaycan dövlətinin əldə etdiyi şanlı zəfər otuz ilə yaxın davam edən işğala son qoydu.

Akademik onu da vurğulayıb ki, Azərbaycan Respublikasının Prezidenti, Ali Baş Komandan İlham Əliyev tarixdə heç bir liderə nəsib olmamış böyük bir missiyanı yerinə yetirərək, Azərbaycanın başqa bir ölkə tərəfindən zəbt edilmiş torpaqlarını işğaldan azad etdi. Müstəqil dövlətimizin bayrağı Qarabağ ərazisində ucaldıldı.  Rafael Hüseynovun sözlərinə görə,  “İstər birinci, istərsə də ikinci Qarabağ müharibəsi şəhidləri  Azərbaycan insanı, onun gələcəyi üçün, onlara ən əziz olan varlığı – canlarını qurban verdilər.

Xalqın tarixində qalan bütün böyük hadisələr kimi son günlərin hərbi əməliyyatları da qurbansız, itkisiz ötüşmədi. Ona görə də biz bu gün şəhidlərimizin xatirəsini bütün Azərbaycan boyu hörmətlə, ehtiramla yad edirik və onların xatirəsi yalnız təqvimdə anmaq üçün ayrılmış günlərdə deyil, həmişə insanlar tərəfindən anılacaq, nəsillərin yaddaşında yaşayacaq”.

Məruzənin sonunda akademik Rafael Hüseynovun “Qarabağ şəhidlərinə” şeiri səsləndirilib.

27 sentyabr Vətən müharibəsi şəhidlərinin anım gününə həsr olunmuş elmi sessiyada muzeyin “Mədəni irs və mənbəşünaslıq” şöbəsinin müdiri, filologiya elmləri doktoru, professor Xatirə Bəşirli də çıxış edərək onillərlə işğal altında qalmış Azərbaycan torpaqlarının azadlığına yönəlmiş qətiyyətli siyasi-hərbi strategiyadan bəhs edib. Bildirilib ki, cəmi 44 günlük savaş ərzində Azərbaycan Milli Ordusu erməni silahlılarına amansız zərbələr endirərək Qarabağ torpaqlarını əsarətdən xilas edib. Xatirə Bəşirli qeyd edib ki, ölkədə Vətən müharibəsinin getdiyi 2020-ci ildə Müzəffər Ali Baş Komandanın rəhbərliyi ilə nizami ordu və yüksək peşəkarlıq, sarsılmaz Xalq-Dövlət birliyi qəhrəman oğullarımızın vətənpərvərlik əzmində, mənəvi-psixoloji ruh halında müstəsna rol oynamışdır.

Növbəti məruzəni muzeyin  “Komparativistika və bədii tərcümə” şöbəsinin müdiri, filologiya elmləri doktoru, professor Şəfəq Əlibəyli təqdim edib. “Aslanın erkəyi, dişisi olmaz” mövzusunda məruzədə, alim qəhrəmanlığı ilə milyonlarla azərbaycanlının ürəyində taxt qurmuş hərbçi Arəstə Baxışovanın həyat yoluna işıq salıb. Şəfəq xanım Arəstə xanım haqqında xatirələrdən çıxış edərək bildirib ki,  44 günlük müharibənin yeganə şəhid xanımı övladlarının təhsili və dərsləri ilə o qədər bağlı imiş ki, hətta şəhid olanda qanlı əsgər geyiminin cibindən belə uşaqlarının dərs cədvəlləri tapılmışdı.

Bildirilib ki, Azərbaycan Silahlı Qüvvələrinin çavuşu və hərbi feldşeri olmuş Arəstə Baxışova ölkə başçısının Sərəncamı ilə ölümündən sonra “Vətən uğrunda” medalı ilə təltif olunmuşdur.

Daha sonra Nizami muzeyinin Xurşidbanu Natəvan adına Qarabağ filiallarının əməkdaşı Rəhman Baxşəliyevə söz verilib.

Əfzələddin Xaqani Şirvani adına aran regional filialının müdiri, filologiya üzrə fəlsəfə doktoru Yaqut Bahadırqızı isə “II Qarabağ savaşı – düşmənə ibrət dərsi” mövzusunda olan məruzəsində II Vətən müharibəsinin unudulmaz şəhid övladlarından, qəhrəman döyüşçülərindən geniş bəhs edib. O, çıxışında qeyd edib ki, “Qanla itirilən torpağı, zülm, istibdad ilə itirilən azadlığı, sülhlə, cəfəng vədlərlə geri qaytarmaq olmaz...”.

Elmi sessiya, rəşadətli Azərbaycan Ordusunun Qarabağ uğrunda döyüşlərdə qazandığı qələbələri sərgiləyən  video çarxın nümayişi ilə davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.