Mədəniyyət kanalında “Vətənim” verlişinin növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedən veriliş bu dəfə Azərbaycan vokal sənətinin inkişafında mühüm rol oynamış dünya şöhrətli müğənni, SSRİ Xalq artisti, Dövlət mükafatı laureatı, professor Bülbülün zəngin yaradıcılığına və irsinə həsr olunub.

Verlişdə bildirilib ki, Bülbül 22 iyun 1897-ci ildə Şuşa yaxınlığında, hazırda Xankəndinin cənub ərazisi olan Xanbağı adlanan yerdə anadan olub. Ecazkar səsi ilə hamını heyran qoyan, öz şaqraq zəngulələrilə bülbülləri susduran və buna görə də xalq tərəfindən Bülbül adlandırılan sənətkarın əsl adı Murtuza Məşədi Rza oğlu Məmmədov olsa da, Azərbaycanda və onun hüdudlarından çox-çox uzaqlarda elə Bülbül kimi tanınıb.

Akademik Rafael Hüseynov qeyd edib ki, Bülbül ilk təhsilini mədrəsədə alıb, bir çox ustad xanəndələrin ilk musiqi biliyinə yiyələndiyi bir ocaqda – Molla İbrahimin məktəbində muğam sənətinin qanun-qaydalarını öyrənib. Xüsusilə görkəmli xanəndə Cabbar Qaryağdı oğlundan o, sənətin çox sirlərini əxz edib. Xalqın sevimlisinə çevrilmiş gənc Bülbülün şöhrəti doğma yurdunun sərhədlərini aşıb, professional xanəndə kimi o, ilk Azərbaycan operalarında da çıxış edib.

Diqqətə çatdırılıb ki, Bülbül 1921-ci ildə təşkil olunmuş Azərbaycan Dövlət Konservatoriyasında ilk azərbaycanlı tələbə kimi vokal təhsili alıb, burada rus və Avropa klassik musiqisini öyrənib. Moskva və Peterburq şəhərlərinə qastrol səfərləri zamanı dinlədiyi görkəmli rus müğənnilərinin, xüsusilə Sobinov və Şalyapinin yaradıcılığı ona böyük təsir göstərib. 1927-ci ildə isə Bülbül vokal sənətinə dərindən yiyələnmək üçün İtaliyaya gedib, burada 4 il müddətində dövrünün tanınmıq musiqiçilərindən dərs alıb, məşhur italyan müğənnilərinin yaradıcılığından bəhrələnib. Vətənə qayıtdıqdan sonra Bülbül sənətin zirvələrinə doğru aparan yolla inamla irəliləyib. Klassik vokal sənətinə ustalıqla yiyələnən Bülbül milli köklərdən ayrılmayaraq, xalq musiqisi üçün səciyyəvi olan xüsusiyyətləri, ənənələri pozmayaraq, yeni üslub yaratmağa can atıb.

Bülbülün Azərbaycan mədəniyyətinin inkişafındakı əvəzsiz xidmətlərindən danışan akademik Rafael Hüseynov bildirib ki, 1932-ci ildə Bülbülün rəhbərliyi ilə Azərbaycan Dövlət Konservatoriyasının nəzdində Elmi-Tədqiqat Musiqi Kabinetinin təşkil edilmiş və burada Azərbaycan xalq musiqi inciləri bəstəkarlarımız tərəfindən məşhur xalq sənətkarlarının ifasında nota köçürülmüşdür.

"Bülbülün adı gələndə çoxlarının göz önündə ilk növbədə Üzeyir bəyin Koroğlusu canlanır. Bu obraz sanki Bülbülün səsinə yazılmış, xalq dili ilə desək, boynuna biçilmişdi. Bülbülün vokalçı kimi şöhrətlənməsi bilavasitə Üzeyir Hacıbəylinin “Koroğlu” operasında yaratdığı əvəzolunmaz obrazla bağlıdır", - deyə akademik Rafael Hüseynov qeyd edib.

Bildirilib ki, dünya şöhrətli müğənni Bülbül mütaliəni çox sevirdi. 1937-ci ildə Moskvada Bülbülün təşəbbüsü ilə Ümumittifaq vokal konfransı keçirilib. Burada o, ölkənin bütün musiqi ictimaiyyətinin böyük marağına səbəb olmuş geniş məruzə ilə çıxış edib.

Verilişi buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.