“Mədəniyyət” kanalında "Vətənim" verlişinin dünya şöhrətli müğənni, SSRİ Xalq artisti, Dövlət mükafatı laureatı, professor Bülbülə həsr olunmuş üçüncü buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedən verilişdə bildirilib ki, Bülbülün mənalı ömür yolu hər zaman böyük əhəmiyyətə malik hadisələrlə zəngin olub. Məşhur müğənni qısa ömür yaşamasına baxmayaraq böyük işlər görməyə müvəffəq olmuşdur.

Qeyd olunub ki, Bülbül Azərbaycan Dövlət Konservatoriyasında görkəmli bəstəkar Asəf Zeynallı ilə birlikdə oxumuşdur. 1932-ci ilin yayında o, Asəf Zeynallı ilə birlikdə Konservatoriyanın nəzdindəki elmi-tədqiqat kabinetinin tapşırığına əsasən xalq mahnılarını toplamaq üçün Qarabağa getmişdi. Səfər çox məhsuldar olmuş, Asəf Zeynallı təkcə özü 50-yə yaxın xalq mahnı nümunəsi əldə etmişdi. Lakin Asəf Zeynallı evə qayıdan zaman yolda yatalaq xəstəliyinə tutulmuş, 1932-ci il oktyabrın 27-də vəfat etmişdi.

Verlişdə Bülbülün 1956-cı ildə Azərbaycan Radiosunda dostu Asəf Zeynallı haqqında danışdığı xatirələri səsləndirilib.

Akademik Rafael Hüseynov bildirib ki, yaradıcılığında, fəaliyyətində Bülbül qədər öncül, Bülbül qədər təşəbbüskar, birincilik missiyasına Bülbül qədər bağlı olan ikinci bir Azərbaycan vokalçısı tapmaq mümkün deyil.

O, həmçinin Bülbülün İnnabı melodiyasına bayatılar əlavə edərək onu mahnı kimi oxuduğunu diqqətə çatdırıb: "Bülbül uzun illər xalqın yaddaşında oyun havası kimi yaşayan "İnnabı" melodiyasını birdən-birə mahnı biçiminə salmağa, ona mahnı ömrü verməyə özündə güc, mənəvi qüvvə tapırdı - çünki Bülbül idi!. Bundan başqa, Bülbül böyük səs diapazonuna malik usta xanəndə Cabbar Qaryağdıoğlunun səsini yazmışdır. 1934-cü ildə Bülbülün başçılığı və Cabbar Qaryağdıoğlunun köməyi Azərbaycan musiqisi üzrə elmi-tədqiqat işləri aparılmışdır. Həmin dövrdə təxminən 300 xalq mahnısı və təsniflər fonovalikə yazılmışdır". 

Bildirilib ki, Bülbül 1938-ci ildə SSRİ Xalq artisti adını alıb, 1940-cı ildə Azərbaycan Dövlət Konservatoriyasının professoru seçilib, 1950-ci ildən SSRİ Dövlət mükafatı laureatı adına layiq görülüb. 1961-ci il sentyabrın 26-da müğənni Bakıda vəfat edib və birinci Fəxri xiyabanda dəfn olunub. Bülbüllə vida mərasimi rus dilində aparılıb. Onun ölümü Azərbaycan musiqi sənəti üçün ağır itki idi. 

Üçüncü buraxılışı buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.