Nizami Gəncəvi adına Milli Azərbaycan Ədəbiyyatı Muzeyində “Edeb Erkan” jurnalının baş redaktoru, türk tayfaları və  xalqlarının mədəniyyəti və dini etiqadlar haqqında çoxsaylı elmi əsərlərin müəllifi, professor Ahmet Taşğınla jurnalların akademik bazalara daxil edilməsi, beynəlxalq indeksli jurnallarda məqalələrin nəşr şərtləri ilə bağlı görüş keçirilib.

Görüşdə professor Ahmet Taşğın “Elmi jurnalların akademik bazalarda tanınması, məqalələrin bu kimi jurnallarda çap olunması imkanları, “Edeb Erkan” jurnalının etik qaydaları və əhatə dairəsi” mövzusuna həsr olunmuş məruzəsini təqdim edib.

Professor A.Taşğın redaktoru olduğu “Edeb Erkan” (Türküstan, Xorasan, Azərbaycan, Rum, Rumeli Marifeti Araştırmaları) jurnalı haqqında məlumat verərək bildirib ki, jurnalda tədqiqatçılar tərəfindən elmi meyarlara uyğun olaraq türk və ingilis dillərində hazırlanmış orijinal tədqiqat işləri, tərcümələr və nəşr dəyərləndirilmələri (resenziya) dərc edilir. Jurnalın əsas istiqamətlərinə sosial elmlər – mədəniyyət, memarlıq, ədəbiyyat, din, sosiologiya, musiqi, tarix və fəlsəfə daxildir.

Daha əvvəl “Scopus” indeksli “Türk kültürü və Hacı Bektaş Veli araşdırmaları jurnalı”nın baş redaktoru olduğunu xatırladan alim qeyd edib ki, hazırda baş redaktoru olduğu “Edeb Erkan” jurnalının da  “Scopus” bazasına daxil edilməsi üçün müraciət edilib.

Akademik platformalarda nəşr imkanları ilə bağlı məlumat verən məruzəçi dünyada elmi araşdırmaların iki istiqamət üzrə aparıldığını diqqətə çatdırıb. Alimin sözlərinə görə, bunlardan biri Avropa qitəsinə, sonra ABŞ-a və ABŞ-dan isə dünyaya yayılan, digəri isə Sovet İttifaqında yazılan və yayılan tədqiqat işləridir.

Baş redaktor əlavə edib ki, Sovet İttifaqında aparılan araşdırmalar fərqli akademik ənənəyə malik olsa da, daha sadə quruluşa malik olurdu. Avropa və ABŞ-ın nəşrlərində isə qarışıqlıq daha çoxdur və texniki qaydalar baxımından sabit bir qəlibə malik deyil. Bu səbəbdən məqalələrin indeksli jurnallarda yayıma qəbul edilməsi üçün tez-tez dəyişən bu texniki qaydaları izləmək şərtdir.

Məqalələrin hazırlanmasında arxa planın nəzəri və konseptual qurulmasının da texniki qaydalara riayət olunması qədər vacib amillərdən olduğunu qeyd edən A.Taşğın eyni mövzu ətrafında fərqli nəzəriyyələrin inkişaf etdirildiyini, bu prosesin dəyərləndirilməməsinin yazılan yazının köhnəlmiş kimi qiymətləndirilərək diqqətdən kənarda qalmasına səbəb olacağını vurğulayıb.

Son zamanlar Azərbaycanlı tədqiqatçıların adlarının akademik nəşrlərdə yer almasını müsbət hal kimi dəyərləndirən alim bu araşdırmaların sayının artırılmasının vacibliyinə diqqət çəkib. Professor qeyd edib ki, Azərbaycan mədəniyyət tarixinin öyrənilməsi baxımından az tədqiq olunub.

Daha sonra professor Ahmet Taşğın muzeyin tədqiqatçılarına öz praktik tövsiyələrini verib, onların suallarını cavablandırıb.

Sonda birgə jurnalın nəşri istiqamətində əməkdaşlıq imkanları müzakirə edilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.