Nizami Gəncəvi adına Milli Azərbaycan Ədəbiyyatı Muzeyində Beynəlxalq Ərəb Dili Günü ilə bağlı seminar məşğələsi keçirilib.

Tədbirdə muzeyin Mədəni irs və mənbəşünaslıq şöbəsinin böyük elmi işçisi, filologiya üzrə fəlsəfə doktoru, dosent Faiq Əliyev “Ərəbdilli Azərbaycan ədəbiyyatı” mövzusunda məruzə ilə çıxış edib. Məruzəçi bildirib ki, VII yüzilliyin II yarısında Mədinədə yaşamış azərbaycanlı şairlərin dövrümüzə gəlib çatmış şeirlərinə istinadən ərəbdilli Azərbaycan ədəbiyyatı faktını həmin əsrə aid etmək olar.

Bildirilib ki, zəngin Azərbaycan ədəbiyyatının mühüm bir qismini müxtəlif dövrlərdə yaşamış Azərbaycan əsilli şair və ədiblərin ərəb dilində yaratdığı əsərləri təşkil edir. “Ərəbdilli Azərbaycan ədəbiyyatı” kimi tanınan bu qiymətli irs daim tədqiqatçıların diqqət mərkəzində olmuşdur.

Faiq Əliyev “əl-Azərbaycani” nisbəli həmin məvali şairlərin yaradıcılığına toxunaraq, onlardan yalnız üç nümayəndənin ‒ Musa Şəhavat, İsmayıl ibn Yəsar və Əbu-l-Abbas əl-Əmanın qələminə məxsus şeirlərin bizə məlum olduğunu söyləyib. Qeyd edib ki, ərəbdilli Azərbaycan poeziyası təkcə, məvali şairlərin yaradıcılığı ilə məhdudlaşmır, bu ənənə sonrakı dövrlərdə Əbu Abdulla əl-Muğləsi əl-Maraği (X əsr), Bərəkəveyh Zəncani (X əsr), Qətran Təbrizi (XI əsr), Əbu Nəsr Mənsur ibn Mümkan Təbrizi (XI əsr), Hüseyn ibn Həsən Xətibi Urməvi (XI əsr), Əbu-l-Məhasin Hüseyn ibn Əli ibn Nəsr Təbrizi (XI əsr), Əli ibn Hibətullah ibn Məhəmməd ibn Xalid Təbrizi (XI əsr), Əbu-l-Qasım Əzizan ibn Məhəmməd Xəttat Nizami Təbrizi (XI əsr), İskafi Zəncani (XI əsr) kimi söz ustalarının yaradıcılığında da özünü göstərir.

Sonda muzeyin elmi işçisi, ərəbdilli izahatçı Rəhilə Sadıqova mövzuya münasibət bildirərək, Nizami muzeyində nümayiş olunan eksponatlar sırasında məvali şairlərdən İsmayıl ibn Yəsarın portretinin də yer aldığını vurğulayıb. O, həmin şairin mənşəyi haqqında, xüsusilə ərəb əsilli ziyarətçilərə məlumat verərkən qonaqların təəccübləndiyini bildirib. Rəhilə Sadıqova bu məlumatın onlar üçün Azərbaycan ədəbiyyatının qədimliyini və zənginliyini anlamaq baxımından böyük əhəmiyyət kəsb etdiyini deyib. Qeyd olunub ki, bu mənada ərəblər arasında “Nisai” təxəllüsü ilə yaxşı tanınan şairin əslən Azərbaycandan olmasını təbliğ etmək muzey əməkdaşlarının mühüm vəzifələrindən birinə çevrilmişdir.

Seminar məşğələsi muzey əməkdaşlarının ünvanladığı sualların cavablandırılması ilə başa çatıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.