İlk dəfə Heydər Əliyev Fondu və Mədəniyyət Nazirliyinin təşkilatçılığı ilə Heydər Əliyevin 100 illik yubileyi çərçivəsində “Gülüstan” Sarayında  Mədəni İrs Forumu keçirilib.

Forumda mədəniyyət nazirinin müavini Səadət Yusifova çıxış edərək Azərbaycanda mədəni irsin qorunmasından danışıb və hər sahədə olduğu kimi bu sahəyə də Ümummilli Lider Heydər Əliyevin diqqət və qayğısını əsirgəmədiyini bildirib. Çıxışdan sonra Ulu Öndərin fəaliyyəti ilə bağlı videoçarx nümayiş olunub.

Tanınmış tarixçi, arxeoloq, rəssam, memar, heykəltaraş, sənətkar, muzey, arxiv işi, abidələrin qorunması və digər sahələr  üzrə mütəxəssislərin iştirakı ilə keçirilən tədbirdə mədəniyyətin və milli irsin yaşadılması, inkişafı və təbliği, mövcud vəziyyət, maddi və qeyri-maddi irsimizə, təsviri və tətbiqi sənətə, tarixi abidələrə dövlət dəstəyi və digər istiqamətlərdə diskussiyalar aparılıb.

Tədbirdə dövlət rəsmiləri, Milli Məclisin deputatları, elm və mədəniyyət xadimləri, mədəni irs üzrə mütəxəssislər də iştirak ediblər.

Forumda Nizami Gəncəvi adına Milli Azərbaycan Ədədbiyyatı muzeyini bir sıra əməkdaşlar təmsil edib. Ulu öndərin yubiley tədbirləri sırasına daxil olan bu dəyərli tədbir mədəniyyətimiz və incəsənitimiz üçün  əhəmiyyətlidir.

Forumun ilk günü müzakirəyə çıxarılan mövzular və təşkil olunan panellər –  “Təsviri sənət və müasir çağırışlar”, “Qeyri-maddi mədəni irsin mühafizəsi və müasir çağırışlar”,“Azərbaycanda daşınar mədəni irs. Muzey işi və müasir çağırışlar”  muzey əməkdaşlarının marağına səbəb olub. Panel iştirakçılarından İşğal və Zəfər muzeylərinin təşkili üzrə kreativ direktor, ekspert Fabrisio Konti işğaldan azad edilmiş torpaqlarımızın bərpası haqqında geniş məlumat verib. Daha sonra “Mədəni irs” forumu çərçivəsində italiyalı ekspert, fotoqraf Fabrisio Kontinin “Agdam Delenda est” fotoalbomu təqdim edilib. Kitabda əsasən Ağdam, Cəbrayıl, Füzuli, Şuşa və işğaldan azad olunmuş digər ərazilərimizin təsvirlərindən ibarət fotolar əksini tapıb.

Tədbirin ikinci günündə Azərbaycanın tarixi mədəni irsini nümayiş etdirən videoçarx nümayiş olunub və  “Azərbaycanın daşınmaz tarixi – mədəni irsinin tədqiqi və mühafizəsi məsələləri”, “Postkonflikt dövründə Azərbaycanın tarixi – mədəni və təbii irsinin qorunması”, “Mədəni irs və müasir memarlıq – Şəhərsalma prinsipləri”  mövzuları səsləndirilib.  

Sarayın foyesində milli tətbiqi-dekorativ sənət nümunələri – misgərlik, xalçaçılıq, kəlağayı sənəti, təkəlduz örnəklərindən ibarət sərgi nümayiş olunub. Misgərlik sənət nümunələri arasında  Natiq Hüseynovun “Evə qayıdış” mövzusunda işlədiyi Azərbaycan əsgərinin döyüşçü dəbilqəsindən boy atmış Xarıbülbül təsviri  və Samir Səmədovun  “Xəzinə yüklü Qarabağ gözəli”  mövzusunda işlədiyi Xarıbülbül simvollu Azərbaycan qadını təsvir edilmişdir.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.