“Mədəniyyət” kanalında yayımlanan "Vətənim" verilişinin Azərbaycanda doğulmuş məşhur şair və alim, X-XI əsrin səyyahı, tədqiqatçı Baba Kuhi Bakuviyə həsr olunan ilk buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedən verlişdə bildirilib ki, tanrı Baba Kuhi Bakuviə quşların dilindən də üstün dil bağışlamış, ona şeir dili vermişdi. Ədib insanın içərisindəki ən dərin qatlarda olan duyğuları sətirlərə döndərə bilirdi. Onun yazdıqları 1000 il öncəki kimi indi də insanları həyəcanlandırmaq qüvvəsindədir.

Baba Kuhi Bakuvinin yaşadığı ömrün sərgüzəştlərlə dolu olduğunu deyən akademik Rafael Hüseynov qeyd edib ki, ədibin ölümündən sonrakı həyatının da macəraları az olmayıb. Hətta üstündən əsirlər keçdikdən sonra onun varlığını dananlar da meydana çıxıb.

Diqqətə çatdırılıb ki, Baba Kuhinin 2 məzarı var, onlardan biri Şirvanda, digər isə Şirazdadır. Hər gün o məzarlar ziyarət olunur. Sağlığında olduğu kimi, Baba Kuhinin böyüklüyünə, möcüzələr yarada biləcəyinə inanan insanlar ona sitayiş edirlər. Hətta rəvayətlərdən birində deyilir ki, Şərqin dahi sənətkarı, böyük İran şairi Hafiz Şirazi öz poetik vergisini bircə gecə Baba Kuhi Bakuvinin Şirazdaki məzarının yanında dua oxuyandan sonra qazanmışdır.

Akademik Rafael Hüseynov bildirib ki, söz və düşüncə tariximizə Baba Kuhi kimi həkk olunmuş mütəfəkkür şairimizin adını mənbələr müxtəlif cür göstərir. Bir çox təzkirə və risalələrdə onun adı daha çox Məhəmmədəli kimi nişan verilməkdədir. Məhəmməd İbn Münəvvərin əsəri isə onun nə zaman dünyaya gəldiyi tarixi öyrənməyə pəncərə açır. Baba Kuhinin bütöv adının yazılışında da müəlliflərin fikirləri fərqlənir. Ancaq ümumun qənaətinə görə, onun bütöv adı belə göstərilir: Əbu Abdullah Məhəmməd ibn Abdullah ibn Übeydullah ibn Bakuyə. Bəzən bu ada Şirazi, yaxud Nişapuri nisbəsi də artırılır. Bu, onunla bağlıdır ki, Kuhi uzun müddət Şirazda və Nişapurda yaşamışdır.

Qeyd edilib ki, Baba Kuhi Şirvanda doğulmuş, sonra Bakıya köçmüş, ömrü boyu səfərlərdə olmuşdur. Mənbələrə görə, o, məşhur mütəfəkkir, ilahiyyatçı və şirvanşah Mənuçöhrün vəziri Pir Hüseyn Şirvaninin doğmaca qardaşıdır. Pir Hüseynin Pirsaat çayı üzərindəki Navahı kəndindəki Pirsaatçay xanəgahı indiyə qədər ziyarətgah kimi qorunub saxlanmışdır. İndi də insanlar axın-axın buranı ziyarət edirlər.

Baba Kuhinin mükəmməl təhsil almış, dövrünün elmlərinə dərindən yiyələnmiş zəka sahibi olduğunu söyləyən akademik Rafael Hüseynov onun Şirazda Əbu Abdullah ibn Xəfifdən dərs aldığını və güclü yaddaşa sahib olduğunu deyib.

Verilişi buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.