2 Fevral – Azərbaycan Gəncləri Günü münasibətilə Aprel şəhidlərinə və qazilərə həsr olunmuş “Geyilməmiş ayaqqabılar” filminin təqdimatı olub.

Tədbir Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialı və Kürdəmir Gənclər Evi Sosial Xidmət Müəssisələrinin birgə təşkilatçılığı ilə baş tutub.

Təqdimat mərasimində şəhid ailələri, qazilər, Vətən müharibəsində döyüşmüş gənclər, rayon ictimaiyyətinin nümayəndələri iştirak ediblər.

Tədbir Azərbaycan Respublikasının Dövlət Himninin səsləndirilməsi ilə başlayıb, daha sonra Vətən uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Milli Azərbaycan Ədəbiyyatı Muzeyi Aran Regional filialının müdiri filologiya üzrə fəlsəfə doktoru Yaqut Bahadurqızı tədbirdə gəncləri əlamətdar gün münasibətilə təbrik edib. Bildirib ki, təməli Ulu Öndər Heydər Əliyev tərəfindən qoyulan gənclər siyasəti bu gün Prezident İlham Əliyev tərəfindən uğurla həyata keçirilir. Dövlətin gənclərə diqqət və qayğı göstərməsi Azərbaycan gəncliyində özünə inam hissini artırır.  

Müstəqil Azərbaycanın ərazi bütövlüyü uğrunda canlarından keçən Vətən oğullarından danışan  Yaqut Bahadurqızı onların da gələcək və Vətən üçün arzuları, niyyətləri olduğunu bildirib, hər birinin həyat dolu, saf niyyətli cəsur igid olduğunu bildirib. O, belə bir gündə qəhrəman Vətən üçün canını fəda edən və əbədi olaraq xalqın yaddaşında gənc qəhrəmanlar kimi yaşayacaq şəhidlərimizı, eləcə də sağlamlığını, əzalarını itirmiş qazilərimizi xatırlatmağın önəmini qeyd edib.     

Sonra tədbir iştirakçıları 2017-ci ildə çəkilmiş, Aprel döyüşlərinin şəhid və qazilərinə həsr olunmuş “Geyilməmiş ayaqqabılar” filmini izləyiblər.

Filmin məzmunu və ekran əsərində insanlara çatdırılan əsas ideya barədə danışan Yaqut Bahadurqızı  bildirib ki, Aprel şəhidlərinin xatirəsinə həsr olunan bu filmdə yurd-yuvasından didərgin düşən və tələbə yataqxanalarında məskunlaşan məcburi köçkünlərin gərgin, psixoloji yaşamı təsvir olunur. Filmdə Qarabağ savaşında gənc ərini və körpə qızını itirmiş, tək oğlu ilə Bakıda qaçqın yataqxanasına sığınmış və hər gün öz doğma torpaqlarına qayıtmaq ümidi ilə yaşayan azərbaycanlı məcburi köçkün qadınların ümumiləşdirilmiş obrazı yaradılıb: “Qadın şəhid ərinin xəyalı və öz ata-baba yurduna dönəcəyi vaxtın intizarı ilə günləri sayır, dünya ölkələrinin bu işğala səssiz qalmayacağına ümid bəsləyərək oğlu Həsrəti təsəlli edir. Həsrət film boyu yalın ayaqla gəzərək Qızıl Ayın bağışladığı yeni ayaqqabıları  doğma yurduna qayıdarkən geyinəcəyi günün həsrətilə yaşayır və anasına: "Qarabağ alınanda atamı və bacımı da götürüb kəndimizə gedərik, ayaqqabıları orda geyecəyəm..." – deyir. Filmin sonunda ana əlil arabasında iki ayağını itirmiş oğlu ilə Xankəndində "Geyilməmiş ayaqqabılar" muzeyinin qarşısına gəlir və oğlunun geyə bilmədiyi iki cüt ayaqqabını muzeyə verir”.

Yaqut Bahadurqızı 2017-ci ildə çəkilmiş filmin rejissoru və ssenari müəllifi, istedadlı aktyor və rejissor Rza Rzayevin yüksək təxəyyülünün və uzaqgörənliyinin, 7-8 il öncəni görə bilmək məharətinin təqdirəlayiq olduğunu vurğulayıb. Qeyd edib ki, Rza Rzayev Xankəndində Azərbaycan bayrağının dalğalanacağına, amansız müharibənin və tarixi qələbəmizin izini özündə əbədiləşdirən muzeylərin açılacağına böyük inamla bu filmi çəkmişdir. Düşündürücü rejissor işi tamaşaçıda dərin psixoloji gərginlik yaradıb.

Diqqətə çatdırılıb ki, filmin quruluşçu operatoru Elman Əliyev, quruluşçu rəssamı Məhərrəm Əliyev, prodüseri Mahir Canasdır. Filmdə Gülzar Qurbanova, Bəhruz Vaqifoğlu, Dəniz Həsənov və başqaları çəkiliblər.

Tədbirdə Kürdəmir Gənclər Evi Sosial Xidmət Müəssisələrinin rəhbəri Nicat Ağarəhimov  çıxış edərək ölkəmizdəki bu günki  gənclər siyasətinin mahiyyətcə yeni mərhələsini yaşadığını, Prezident İlham Əliyevin Ulu Öndərin gənclər siyasətinə sadiqliyini öz qərarları ilə təsdiq etdiyini, gənclərin mənəvi inkişafı, vətənpərvərlik tərbiyəsi, ölkəmizdə sosial müdafiəyə ehtiyacı olanların problemlərinin həlli istiqamətində görülən işləri nəzərə çatdırıb. O, eyni zamanda “Geyilməmiş ayaqqabılar” filminin mahiyyətindən bəhs edərək belə ekran əsərlərinin gənclərimizin vətənpərvər ruhda tərbiyə olunmasında müstəsna rol oynadığını vurğulayıb.

Daha sonra 44 günlük Vətən müharibəsində sona qədər döyüşərək şəhid olmuş tank bölük komandiri, baş leytenant Fərrux Hüseynovun anası Səhər Hüseynova, köçkünlük həyatının əzablarını yaşamış şəhid Ziyadxan Əliyevin anası Müşgünaz Əliyeva çıxış ediblər. Onlar rəşadətli Azərbaycan  Ordusunun sıralarında Vətən uğrunda mətanətlə vuruşan qəhrəman gənclərimizin adlarını xalqımızın ən yeni tarixinə qızıl hərflərlə yazmalarından, onların rəşadəti sayəsində əldə olunan şanlı Zəfərdən, Azərbaycan ərazi bütövlüyünün bərpa edilməsindən, xalqımızın 30 illik həsrətdən sonra tarixi torpaqlarımıza qovuşmasından danışıb, film haqqında təəssüratlarını bölüşüblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.