Gənc qrossmeyster Nicat Abbasovun beynəlxalq şahmat turnirlərində bir-birinin ardınca qazandığı nailiyyətlər, addım-addım daha yüksək zirvələrə doğru irəliləməsi bu haqda eşidən, oxuyan hər azərbaycanlını sevindirir.

Sevindirməlidir də!

Çünki şahmat bir zəka yarışmasıdır və dünya ağıl çarpışmalarında Azərbaycandan olan hər təmsilçinin müvəffəqiyyəti insanlarımızı ən əvvəl elə Vətənin uğuru kimi fərəhləndirir.

Ancaq Nicat mənimçün yüksələn, istedadı ilə diqqət çəkən və hər soydaşımızda fəxr oyadan bir parlaq gəncimiz olmaqdan daha əvvəl doğma, əziz bir varlıqdır.

Nicatın artıq 28 yaşı tamamdır.

İnanmağım gəlmir!

2001-ci ilin sentyabrında onun 6 yaşı vardı.

Birinci sinfə gedirdi, "Əlifba" öyrənirdi və nə qədər yaşa dolsa da, elə mənim gözümdə o cür də qalmaqdadır.

Necə bir valideynin nəzərində balası elə həmişə uşaqlıq illərindəki şirinliyində qalır, Nicat və onun ovaxtkı sinif yoldaşlarının hər biri də mənimçün həmin təhərdir.

Mən birinci siniflərçün yeni "Əlifba" kitabı yazmışdım.

Unudulmaz Heydər Əliyev (və onun ikiqat adaşı - nəvəsi) həmin kitabın ilk oxucularından olmuşdu. Bəyənmişdi və ovaxtkı Təhsil Naziri Misir Mərdanovun söyləməsincə ona zəng vurmuşdu ki bu dərsliyi təsdiq edin.

Misir müəllim də Təhsiul Nazirliyində Azərbaycanın görkəmli ziyalıları və peaqoqlarının, təhsil mütəxəssislərinin iştirakı ilə böyük müşavirə təşkil etmişdi. Kitabın nüsxələrini respublikanın müxtəlif rayonlarındakı məktəblərə göndərmişdik və bir təhsil ocağında – Bakıdakı 6 saylı məktəbdə özüm də dərs deməyə başlamışdım ki, dərsliyin əyər-əskiyini bilavasitə təcrübədə tutum.

Dərs deyəcəyim sinifdəki ilk məşğələmə Misir müəllim də gəlmişdi.

1 dərs ili sərasər o uşaqlarla oldum.

Sinifdə 28 şagird vardı və hər birini çox sevirdim. Hər biri də açıldı, əlaçıya döndü. Hər səhər mən məktəbə gələndə hamısı elə dəhlizdəcə mənə sarılırdı və o anlarda xoşbəxt idim. Hiss edirdim ki, uşaqların mənə belə sevgisinə istər-istəməz bəzi müəllimlər hətta bir qədər qısqanclıqla yanaşır. Neyləməli, sevgi elə duyğudur ki, gərək o hər iki tərəfdən tam ürəyin dibindən gələ ki, belə də bəhrəsi ola.

Nicat o 28 şagirddən biri idi.

Və ən çox sevdiklərimdən idi.

Bir dəfə Avropa Şurasının növbəti iclasında iştirak edərək Fransadan qayıdandan sonra uşaqlara üstündə Parisin mənzərələri olan kiçik şokoladlar paylamışdım.

Bir neçə gün sonra məktəbdə Nicatın anası ilə rastlaşdıq və məni riqqətə gətirən əhvalatı danışdı.

Deyir, Nicatı yoxlamaqçün xahiş etdim ki, şokoladını versin yeyim. Vermədi ki, Rafael müəllimin hədiyyəsidir, saxlayacağam, onda özümü elə göstərdim ki, guya küsdüm. Bir qədərdən sonra Nicat yaxınlaşdı ki, yaxşı al ye, amma kağızını özümə qaytar, saxlayacağam.

İllər keçib. O uşaqların hərəsi həyatda bir yolla irəliləyir, hərəsinin öz uğurları var, hər birinin hər yüksəlişi də məni duyğulandırır, qəlbən sevindirir.

Hərdən-hərdən yanıma gəlirlər. Saatlarla söhbətləşirik. Hər gəlişləri mənimçün doğmalarımla arzulanan görüşdür. Ancaq onlar əslində gəlməyəndə də elə hər gün mənimlədirlər.

Masamın üstündə 2001-ci ildə bütün siniflə birgə çəkdirdiyimiz foto daim gözümün önündədir.

…Onlarla elə dərs keçmişdim ki, artır əlifbanı öyrənməyə başladıqları 4-cü ayda inşa yazırdılar.

Hamısını saxlamışam.

Nicat bu inşasını 2002-ci ilin martında yazıb. Novruz bayramı ərəfəsində.

(Bu da mənim ona Novruz hədiyyəm!).

22 il keçib. Indi Nicatın adı Beynəlxalq Şahmat Federasiyasının (FIDE) rəsmi saytında vaxtaşırı görünməkdədir.

Yenə martdır və Nicatın uğurlarının sorağı dünyanın o başından gəlir.

Kanadada Şahmat üzrə İddiaçılar Turnirinin püşkatması baş tutub.

Aprel ayının 2-si ilə 25-I arası Kanadada İddiaçılar Turniri keçiriləcək. O yarışlarda Nicat ilk turda rusiyalı Yan Nepomnyaşi ilə, ikinci turda Fabiano Karuana (ABŞ), üçüncü turda bu ölkənin digər şahmatçısı Hikaru Nakamura, dördüncü turda Əlireza Firuzca (Fransa), beşinci turda Dommaracu Qukeş, altıncı turda Rameşbabu Praqnanandha, yeddinci turda isə Santoş Viditlə ( hər üçü Hindistan) görüşəcək. Səkkiz şahmatçının mübarizə aparacağı yarışın qalibi şahmat tacı uğrunda matçda dünya çempionu Din Lirenə rəqib olacaq.

Görürsünüzmü Nicatımızın səsi haralardan gəlir!

Brinci sinifdə olanda yazdığı inşanın son cümlələrindən biri budur ki, Rafael müəllim istəyir biz hamımız yaxşı oxuyaq, Vətənimizi qoruyaq.

Əziz Nicatım!

Sən arzularımızı doğruldursan, uzaq Torontoda elə Vətənimizin şərəfini qoruyacaqsan və biz də hər gün məhəbbətimiz və dualarımızla sənin yanında olacağıq.

Sən 22 il əvvəl mənim sənə bağışladığım şokoladın kağızını, birgə şəkillərimizi saxlayırdın, mən isə yalnız sənin və sinif yoldaşlarının ovaxtkı fotolarınızı, yazılarınızı sevimli yadigarlar kimi saxlamıram, sənin uğurların haqqında qəzetlərdə, jurnallarda dərc edilən xəbərləri də ayrıca bir qovluqda toplayıram.

Xoşbəxt bir sabahda şahmat üzrə dünya dünya çempionu adını qazanacaq əziz Nicatım haqda məqaləmi yazmağa bəri başdan tədarük görürəm!

O günü tez gətir!