Bakı Dövlət Universitetinin Şəqrşünaslıq fakültəsinin 30 nəfər tələbəsi istehsalat təcrübəsi keçmək üçün Nizami Gəncəvi adına Milli Azərbaycan Ədəbiyyatı Muzeyinin “Doktorantura və elmi inkişaf” şöbəsinə təhkim olunublar. Tələbələrin praktik biliklər qazanması və yeni məlumatlar əldə etməsi üçün müxtəlif mövzularda elmi və təcrübi seminar və ekskursiyalar təşkil edilməsi planlaşdırılıb.

Bu tədbirlər çərçivəsində muzeyin Ekspozisiya şöbəsinin müdiri Tomiris Babanlı “Mirzə Şəfi Vazeh irsi tərcümə və nəşrlərdə” mövzusunda seminar keçirib. Məruzəçi XIX əsr Azərbaycan ədəbiyyatı tarixində görkəmli maarifpərvər, pedaqoq, şair, xəttat kimi tanınan Mirzə Şəfi Vazehin şəxsiyyəti və yaradıcılığı haqqında tələbələrə məlumat verib. O, dinləyicilərin diqqətinə çatdırıb ki, Mirzə Şəfi Vazeh Azərbaycan poeziyasının ilk müntəxəbatının və Tiflis gimnaziyası üçün tərtib edilən "Tatar-rus lüğəti"nin (rus pedaqoq İv. Qriqoryev ilə birgə) müəllifidir: “hələ 1840-cı ildə Tiflisdə rus gimnaziyasında Azərbaycan dilinin təlimi ilə məşğul olarkən Mirzə Şəfi azərbaycanca təlim vəsaiti yaratmaq təşəbbüsünü öz öhdəsinə götürmüş və gimnaziyanın fars dili müəllimi İ.Qriqoryevlə birlikdə Azərbaycan dili müntəxabatı tərtib etmişdi. Müntəxabatın lüğət hissəsi (azərbaycan-rus lüğəti) 1851-ci ilin yanvarında, müntəxabat özü isə həmin ilin aprelində nəşrə hazır olsa da Mirzə Şəfinin sağlığında nəşr edilə bilmədi. 1855-ci ildə müntəxabat lüğətlə birlikdə İ.Qriqoryev tərəfindən Təbrizdə nəşr olundu və uzun müddət gimnaziyanın aşağı siniflərində dərs vəsaiti kimi istifadə edildi.”

Tomiris Babanlı həm də Mirzə Şəfinin Tiflisdə təşkil etdiyi “Divani-hikmət” adlı ədəbi məclis barədə də tələbələri məlumatlandırıb, Mirzə Şəfinin yaradıcılığının ayrı-ayrı mərhələləri haqqında onlara geniş bilgilər verib.

Daha sonra iştirakçılar mövzu ilə bağlı öz suallarını veriblər.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.