Akademik Rafael Hüseynov qeyd edib ki, Aliyə Məmmədova Azərbaycan bəstəkarlarının yeni nəslinin təmsilçilərindəndir. Atası Tariyel Məmmədov da həsəvkar bəstəkar kimi tanınırdı. O, Əməkdar incəsənət xadimi Fərəc Qarayevin tələbəsidir. 

 

Diqqətə çatdırılıb ki, 1971-ci ildə Bakı şəhərində anadan olub, 1987-ci ildə Bakı şəhəri 29 saylı orta məktəbi və 1 saylı Bakı İncəsənət məktəbini fortepiano ixtisası üzrə fərqlənmə ilə bitirib. 1991-ci ildə Asəf Zeynallı adına Bakı Orta İxtisas Musiqi Kollecini “Musiqi nəzəriyyəsi” ixtisası üzrə fərqlənmə diplomu ilə başa vurub, burada Leonid Vaynşteylə bəstəkarlıq üzrə məşğul olub. 1996-cı ildə Üzeyir Hacıbəyli adına Bakı Musiqi Akademiyasının bəstəkarlıq fakültəsini prof. Fərəc Qarayevin sinfində fərqlənmə diplomu ilə bitirib.

 

Bildirilib ki, Aliyə Məmmədova simfonik, kamera-instrumental əsərlərin müəllifidir, yaradıcılığı məzmunca çox zəngindir. Onun yaradıcılığında həm Azərbaycan bəstəkarlıq məktəbinə xas ənənəvi cəhətlər var, digər tərəfdən də Azərbaycan bəstəkarlıq məktəbi üçün səciyyəvi olmayan solo gitara kimi heyətdən, böyük simfonik orkestrə qədər, qədim şərq alətləri ansamblından müasir kvartetlərə qədər kifayət qədər zəngin bir alət və tərkib kataloqu müşahidə edilir. Bəstəkarın əsərləri arasında klassik sonata, fuqa, kvartet, simfoniya kimi forma və janrlarla yanaşı sinkretik tərzdə yazılmış olanlar da mövcuddur.

 

Rafael Hüseynovun sözlərinə görə, ilk böyük uğur bəstəkara 2001-ci ildə nəsib olub. O, Moskvada keçirilən P.Yurgenson adına I Beynəlxalq müsabiqədə II mükafata layiq görülüb. Aliyə Məmmədovanın əsərləri Azərbaycan, Özbəkistan, Rusiya, Almaniya, Avstriya, Ukrayna və İsveçrədə keçirilən konsert və festivallarda ifa edilib, bir sıra not əsərləri İsveçrədə nəşr olunub. Bəstəkar “Müasir harmoniyada funksionallığın həlli yolları” metodik vəsaitinin də müəllifi, Bakı Musiqi Akademiyasının “Musiqi nəzəriyyəsi” şöbəsinin dosentidir. Həmçinin 2007-ci ildən Azərbaycan Bəstəkarlar İttifaqının üzvüdür. 

Akademik Rafael Hüseynov tələbəsi olmuş Aliyə Məmmədovanın ilk dəfə Almaniyada səslənmiş “Səslərin səyahəti” əsərinin onun bəstəkar ömrünün açarı olduğunu bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.