Dekabrın 26-da AMEA Nizami Gəncəvi adına Milli Azərbaycan Ədəbiyyatı Muzeyində avstraliyalı ingilis yazıçısı və publisist Ceyms Oldricin 100 illik yubileyinə həsr olunan “O, Azərbaycanı sevirdi” adlı elmi sessiya keçirilib.

Tədbirdə “O, Azərbaycanı sevirdi” adlı məruzə ilə çıxış edən muzeyin direktoru, akademik Rafael Hüseynov Ceyms Oldric qələminin, yazıçı təfəkkürünün XX əsr Azərbaycanın mədəni, siyasi mənzərəsindəki gerçəkliklərin carçısı kimi mühüm rolundan, ruhu və düşüncəsi ilə Azərbaycan torpağına bağlı olan bu ingilis ədibinin yaradıcılığından söz açıb. Xatırladıb ki, 2003-cü ildə Ədəbiyyat Muzeyində yazıçının 85 illik yubileyi qeyd edilib.

R.Hüseynov bildirib ki, əsrlərboyu Azərbaycanın tarixi gerçəkliklərini, zəngin mədəni, etnoqrafik, coğrafi dəyərlərini dünya ictimaiyyətinə çatdıran yüzlərlə qərb səyyahları, xadimləri olub. XX yüzilliyin belə məşhur fikir adamlarından biri də mənşəcə avstraliyalı ingilis yazıçısı, publisisti Ceyms Oldric idi. O, hələ yetkinlik yaşlarından doğulub böyüdüyü ucqar Avstraliya şəhərindən ayrılaraq İkinci Dünya müharibəsi illərində hərbi müxbir kimi fəaliyyətə başlayıb. Sonralar müxtəlif bədii nəsr əsərlərinin müəllifi kimi tanınacaq Oldricin həyat yolu onu Azərbaycana da gətirib. Yazıçının yaradıcılığında Azərbaycan mövzusu əhəmiyyətli yer tutur. O, dəfələrlə keçmiş SSRİ-də, o cümlədən Azərbaycanda olub. Bu ölkəyə maraq, onu öyrənmə və ona bağlılıq hissi yazıçının məşhur “Diplomat” romanını ərsəyə gətirməsi ilə nəticələnib. Azərbaycandan, onun zəngin dil xəzinəsindən, Cənubi Azərbaycanın 1945-1946-cı illərdəki milli azadlıq hərəkatından bəhs edən bu dəyərli əsər çox keçmir ki, bütün dünyaya yayılır və otuza yaxın dilə tərcümə edilir.

Tədbirdə Ceyms Oldric şəxsiyyəti, yaradıcılığı haqqında məruzələr dinlənilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.