AMEA Nizami Gəncəvi adına Milli Azərbaycan Ədəbiyyatı Muzeyində 27 Mart - Elm Gününə həsr olunan elmi sessiya keçirilib.

Tədbiri giriş sözü ilə açan muzeyin baş direktoru, akademik Rafael Hüseynov Prezident İlham Əliyevin 2018-ci il 9 aprel tarixli Sərəncamı ilə martın 27-nin Azərbaycanda Elm Günü elan olunduğunu bildirib. Bu günün 1945-ci il 27 mart tarixində Azərbaycan Elmlər Akademiyasının təsis olunduğu günə təsadüf etdiyini deyən alim bildirib ki, həmin gün elmlə məşğul olan hər bir insanın daxilində “Elm günü”nün əhval-ruhiyyəsi hiss olunur.

R.Hüseynov AMEA-nın yaradılması tarixindən söz açaraq indiki Azərbaycan Milli Elmlər Akademiyasının təməlinin 1923-cü ildə Nəriman Nərimanovun təşəbbüsü ilə yaradılmış Azərbaycanı Tədqiq və Tətəbbö Cəmiyyətinə söykəndiyini deyib və AMEA-nın yaradılması tarixinin məhz həmin ilə əsasən müəyyənləşdirilməsinin əhəmiyyətinə toxunub.

Daha sonra baş direktor “Azərbaycan düşüncə mühitində elm və poeziyanın vəhdəti” mövzusunda məruzə ilə çıxış edərək Azərbaycan ədəbiyyatının tarixi təşəkkül dövründə onu yaradan fikir, irfan sahiblərinin şeir sənəti ilə yanaşı, elmin müxtəlif sahələrinin də mahir bilicisi olduğunu qeyd edib. “Azərbaycan tarixən əhali sayına və ərazisinə görə digər böyük dövlətlərlə müqayisədə, daha kiçik ölkələr sırasına daxil olmasına baxmayaraq hər zaman öz elmi, mədəniyyəti və s. ilə dünyanın nəbz vuran dövlətlərdən biri olmuş, aparıcı mərkəzlərdən birinə çevrilmişdir”, - deyə bildirən alim ölkəmizə bu şöhrəti gətirənlər arasında Azərbaycan alimlərinin xüsusi yerə sahib olduğunu diqqətə çatdırıb. R.Hüseynov Azərbaycanın hələ orta əsrlərdə elm, ədəbiyyat, mədəniyyət və incəsənət sahəsində əldə etdiyi nailiyyətlərdən bəhs edib. 

Akademikin sözlərinə görə, tarix boyunca elm Azərbaycan insanını yönəldən, cəmiyyətimizi tanıdan və şöhrətli edən bir güc olaraq hər zaman ön sırada dayanıb. Azərbaycan tarix içərisində doğan mədəni potensialı, böyük elmi irsi, yetişdirdiyi dahi şəxsiyyətlər ilə özündən ərazi və əhali baxımından böyük olan dünya xalqları ilə eyni sırada dayanmaq qüdrətinə malikdir.

“Azərbaycan xoşbəxtdir ki, XXI yüzillikdə onun AMEA kimi bir elm məbədi fəaliyyət göstərir”, - deyən R.Hüseynov qeyd edib ki, elmin yaradıcılarının doğulduğu hər bir günü “elmin günü” hesab etmək olar.

Baş direktor çıxışının sonunda elm yolunda xidmət göstərən hər kəsi Elm Günü münasibətilə təbrik edib, onlara yeni nailiyyətlər arzu edib.

Tədbirdə, həmçinin muzeyin Elmi inkişaf və tədris layihələri şöbəsinin müdiri professor Kamil Allahyarovun “Elm və poeziya; oxşar və fərqli cəhətlər” mövzusunda məruzəsi dinlənilib.

Elmi sessiyada hazırda Nizami muzeyində təcrübə keçən Bakı Slavyan Universitetinin və Bakı Dövlət Universitetinin tələbələri də iştirak ediblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.