Dekabrın 11-də AMEA Nizami Gəncəvi adına Milli Azərbaycan Ədəbiyyatı Muzeyində ümummilli lider Heydər Əliyevin anım günü ilə bağlı “Həmişə ön cərgədə olan Ulu öndər” mövzusunda videokonfrans keçirilib.

Tədbiri giriş sözü ilə açan muzeyin direktoru, akademik Rafael Hüseynov görkəmli dövlət xadiminin Azərbaycan tarixində əvəzsiz rolundan bəhs edib. Bildirib ki, Heydər Əliyev Azərbaycan millətini tarix içərisində irəliləyən güclü xalqa çevirmək, Azərbaycan adını dünyada təsdiqlətmək istiqamətində mühüm işlər görüb.

Bu gün Azərbaycanın tarixindəki ən xoşbəxt günləri yaşadığını vurğulayan Rafael Hüseynov artıq ulu öndər Heydər Əliyevin ən böyük arzusunun reallaşdığını, torpaqlarımızın işğaldan azad edildiyini və müasir Azərbaycan dövlətinin qurucusunun ruhunun şad olduğunu söyləyib: “Unudulmaz Heydər Əliyev vəfatından az öncə Azərbaycan xalqına ünvanladığı məktubda İlham Əliyevə özü qədər inandığını, həyata keçirməyə imkan tapmadığı bütün məsələləri məhz İlham Əliyevin həll edəcəyinə ümid bəslədiyini yazmışdı. Tarix Ulu öndərin bu sözlərinin həqiqətini sübuta yetirdi. Prezident İlham Əliyev Azərbaycanı dünyada söz sahibi olan güclü, inkişaf edən, nüfuz sahibi bir dövlətə çevirdi və o, xalqımızın illərdən bəri ən ağır problemi olan Qarabağ düyününü açmağa müvəffəq oldu. Heydər Əliyevinsə bu böyük qələbəyə gələn yolda zəhmətləri, səyləri az olmamışdı. Səbəbsiz deyil ki, Türkiyə Cümhuriyyətinin Prezidenti Rəcəb Tayib Ərdoğan möhtəşəm Qələbə paradımızda ən ilklərdən biri olaraq Ulu öndərin adını ehtiramla andı”.

Daha sonra videokonfransda muzeyin elmi işlər üzrə direktor müavini, professor Xatirə Bəşirlinin “Heydər Əliyev: Şuşasız Qarabağ, Qarabağsız Azərbaycan yoxdur” adlı məruzəsi dinlənilib. Alim bildirib ki, hələ 1967-ci ildə ilk dəfə Şuşa şəhərini ziyarət edən Heydər Əliyev şəhərin ermənilər tərəfindən əsrin əvvəllərində yandırılıb dağıdılmış məhəllələrində, kəndlərində olub. Bu səfərin üzərindən çox vaxt keçmədən dövlət başçısı həm Şuşada, həm də bütövlüklə Qarabağda milli ruhun dirçəldilməsi, şəhərin tarixi simasının yenidən qurulması üçün önəmli qərarlara imza atıb. Xatirə Bəşirli onu da vurğulayıb ki, məhz bu addımlardan sonra Şuşada bir çox elm və mədəniyyət xadimlərinin ev muzeyləri, məzar yerləri bərpa edilib. Ulu öndərin diqqət və səylərinin nəticəsi olaraq 1977-ci ildə Şuşa şəhəri tarix-memarlıq qoruğu elan edilib.

Tədbirdə muzeyin Komparativistika və bədii tərcümə şöbəsinin müdiri, professor Şəfəq Əlibəyli “Əbədi miras: Heydər Əliyev siyasəti” mövzusunda çıxış edərək ümumilli liderin anım günü münasibətilə Türkiyə mətbuatında yer almış fikirləri səsləndirib. Qeyd edib ki, Heydər Əliyev Türkiyə sevdalısı olduğunu hər zaman çıxışlarında dilə gətirib, atdığı hər addımda həm Azərbaycanın, həm də Türkiyənin mənafelərini qoruyan lider olub. Onun  “Biz bir millət, iki dövlətik”  ifadəsi, bu gün Azərbaycan və Türkiyə üçün nəsildən nəslə ötürülən atalar sözünə çevrilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.