Avqustun 29-da Azərbaycanın bir qrup elm, ədəbiyyat, mədəniyyət xadimlərindən ibarət nümayəndə heyətinin tərkibində Vaqif Poeziya Günlərinin açılışında iştirak üçün Şuşaya səfər  edən Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynov “REAL TV”də yayımlanan “Real intervyu” verilişinə müsahibə verib.

Akademik Vaqif məqbərəsinin açılışı, Vaqif Poeziya Günlərinin yenidən təşkili və Azərbaycan mədəniyyətinin paytaxtı Şuşa şəhəri ilə bağlı təəssüratlarını bölüşüb.

R.Hüseynov Vaqifin məqbərəsinin açılışını və Vaqif Poeziya Günlərinin yenidən təşkilini mədəniyyət hadisəsi olmaqla yanaşı, həm dərin siyasi yük daşıyan, həm də dərin tarixi çəkiyə malik olan hadisə kimi qiymətləndirib.

Qeyd edib ki, Azərbaycanın mərd oğlu, Ali Baş Komandan İlham Əliyev Qarabağın, Azərbaycanın səs mərkəzi hesab olunan Şuşa şəhərini Azərbaycana yenidən bağışlaması ilə xalqın daxilindəki sınıqlıq duyğusunu aradan qaldırdı, milli ləyaqət hissini millətimizə qaytardı. 

Sıldırım qayalıqlar üzərində yerləşən Şuşanın alınmasını böyük möcüzə adlandıran akademik bu torpaqlarda qısa müddət ərzində həyata keçirilən genişmiqyaslı quruculuq işlərinin də dövlət başçısının göstərişi ilə icra edilən möcüzəvi tədbirlərdən olduğunu vurğulayıb.

Akademik R.Hüseynov Prezident İlham Əliyevin Şuşada Vaqifin məqbərəsinin yenidən açılışına qərar verməsinin səbəblərinə toxunub, bunun təsadüfi olmadığını söyləyib. Bildirib ki, Qarabağda, həmin ərazidə Vaqifin abidəsinin ucaldılmasını hələ 1936-cı ildə Azərbaycan Xalq Komisarları Soveti qərara alıb. O, Molla Pənah Vaqifin Azərbaycan tarixi, dövlətçiliyi üçün hər zaman bir rəmz olduğunu qeyd edərək vurğulayıb ki, dahi şair Azərbaycan ədəbiyyatında yeni yol yaratmış sənətkarlardandır. R.Hüseynov Vaqifin Şuşada mədrəsə açmış ilk şəxsiyyətlərdən olduğunu da bildirib.

1982-ci ildə Molla Pənah məqbərəsinin açılışının məhz ümummilli lider Heydər Əliyevin iradəsi, əzmi və Kremldə olan nüfuzu sayəsində mümkün olduğunu diqqətə çatdıran R.Hüseynov  əlavə edib ki, Ulu Öndər Qarabağda ucaldılan bu məqbərəni ən uca sərhəd dirəyi kimi görürdü: “İnanıram ki, Azərbaycan dövlətinin qüdrəti, xalqımızın sevgisi və iradəsi ilə həmin uca sərhəd dirəyinin üzərində bir daha qara buludlar görünməyəcək. Mola Pənah Vaqifin qayıdışından başlayan bu böyük yüksəlişlər, quruculuqlar öz bəhrələri ilə Azərbaycan insanını sevindirəcək”.

© Bütün hüquqlar qorunur. Xəbərlərdən istifadə edərkən www.nizamimusum.az saytına istinad zəruridir.