AMEA Nizami Gəncəvi adına Milli Azərbaycan Ədəbiyyatı Muzeyində istehsalat təcrübəsi keçən Bakı Slavyan Universitetinin tələbələri ilə növbəti görüş keçirilib. Tələbələr “Orxon-Yenisey kitabələri türk tarixi abidəsi kimi” və “Mədəniyyət və mənəviyyat məbədi – Nizami Muzeyi” mövzusunda seminar məruzələrini dinləyiblər.

Muzeyin icraçı direktoru, fəlsəfə üzrə fəlsəfə doktoru Kəmalə Nuriyeva Orxon-Yenisey kitabələrinin tədqiqat tarixi haqqında ətraflı məlumat verib. O, Göytürk əlifbası ilə yazılan məzarüstü daş kitabələrin elmə ilk məlumolma və yazılarının oxunma tarixi, tərcüməsi, dünya və Azərbaycan tədqiqatçıları haqqında dinləyiciləri məlumatlandırdıqdan sonra abidələrin qısa təsnifatını diqqətə çatdırıb.

Məruzəçi 140-145 yazıdan ibarət Yenisey abidələrindən bir neçə mühümü üzərində dayandıqdan sonra Orxon abidələri barədə də danışıb. K.Nuriyeva Bilgə kağan, Kül tigin, Tonyukuk kitabələrinin Göytürk əlifbası ilə yazıya alınmış məlum bütün abidələrin içərisində ən məşhur olduğunu qeyd edib. Həmçinin Orxon abidələrindən Kül tigin abidəsinin Göytürk yazısının açılmasında açar rolu oynadığını, yazıların məzmunu, onların bugünkü vəziyyəti, harada qorunub saxlanılması, bu əlifba ilə qələmə alınmış kağız üzərindəki yazıların da mövcudluğunu diqqətə çatdırıb.

Yeni və müasir Azərbaycan ədəbiyyatının tədqiq və təqdimi şöbəsinin elmi işçisi Törəxanım Hüseynova yaşı səksəni ötmüş Nizami muzeyinin keçdiyi tarixi təşəkkül yolu və bugünkü fəaliyyəti haqqında tələbələrə geniş məlumat verib. Sonra görkəmli ədəbiyyat xadimlərinin şəhərimizdə yer alan ev-muzeyləri, onların ədəbi-ictimai fikir salnaməmizi yaşadan zəngin ekspozisiya zallarından bəhs olunub.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.