Onkoloji xəstəlikdən əziyyət çəkən tənqidçi alim, Nizami Gəncəvi adına Milli Azərbaycan Ədəbiyyatı Muzeyinin baş elmi işçisi, filologiya üzrə elmlər doktoru, dosent İradə Musayeva fevralın 6-da vəfat edib.

İradə Əyyub qızı Musayeva 1963-cü il dekabr ayının 15-də Ağdam şəhərində anadan olmuşdu. 1982-ci ildə Azərbaycan Dövlət Universitetinin Filologiya fakültəsinə daxil olmuş, 1987-ci ildə universiteti filoloq, Azərbaycan dili və ədəbiyyat müəllimi ixtisası üzrə bitirmişdi. O, 1987-ci ildə Ağdam şəhərinin Evoğlu kənd orta məktəbinə müəllim təyin edilmiş, 1997-ci ilə qədər həmin məktəbdə çalışmışdı.

1997-ci ildən Bakı Qızlar Universitetinin Azərbaycan dili və ədəbiyyat kafedrasının baş müəllimi, 2002-ci ildən 2009-cu ilədək həmin universitetdə Filologiya-tarix fakültəsinin dekanı, 2009-cu ildən 2013-cü ilədək Tədris işləri üzrə  prorektor vəzifələrində çalışmışdı. 2014-2023-cü il tarixinədək “İçərişəhər” Dövlət Tarix-Memarlıq Qoruğu İdarəsində Elm şöbəsində elmi işçi, baş mütəxəssis və şöbə müdiri vəzifələrində işləmişdi. İradə Musayeva 2023-cü ildən Nizami Gəncəvi adına Milli Azərbaycan Ədəbiyyatı Muzeyinin baş elmi işçisi vəzifəsində çalışırdı.

O, 2001-ci ildə “Vaqif  Səmədoğlunun poeziyası” mövzusunda dissertasiyasını müdafiə edərək filologiya üzrə fəlsəfə doktoru alimlik dərəcəsi, 2014-cü ildə isə “dosent” elmi adını almışdı. 2022-ci ildə “Roman təfəkkürü və janrın Azərbaycan ədəbiyyatında təkamülü” mövzusunda dissertasiya işini uğurla müdafiə edərək elmlər doktoru elmi dərəcəsi almışdı.

Alim “Vaqif Səmədoğlunun poetik dünyası”, “Tənqidin sözü-sözün tənqidi”, “Çağdaş Azərbaycan romanının nəzəri-metodoloji problemləri”, “Ceyms Coys və ədəbiyyatda devrim”, “XXI əsrdən baxış: ədəbi tənqid və bədii söz” adlı kitabların, müasir Azərbaycan nəsrinin, poeziyasının və dramaturgiyasının, eləcə də ədəbiyyatşünaslığın nəzəri problemlərinə həsr olunmuş 100-dən çox elmi məqalənin, həmçinin tədris-metodik vəsaitlərin müəllifi idi.

Allah rəhmət eləsin!

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.