Aprelin 28-də AMEA-nın Əsas Binasında AMEA-nın 2016-cı ildəki elmi və elmi-təşkilati fəaliyyətinə həsr olunmuş Ümumi yığıncağı keçirilib. Öncə tədbir iştirakçıları akademiyanın institut və elmi-tədqiqat müəssisələrinin elmi nailiyyətlərini əks etdirən sərgi ilə tanış olublar.

Sərgidə AMEA Nizami Gəncəvi adına Milli Azərbaycan Ədəbiyyatı Muzeyinin əsas fəaliyyət istiqamətlərini əks etdirən stend də nümayiş etdirilib.

AR Prezidenti Administrasiyasının rəhbəri, akademik Ramiz Mehdiyev, AMEA-nın prezidenti, akademik Akif Əlizadə, Moskva Dövlət Universitetinin Bakı filialının rektoru, AMEA-nın müxbir üzvü, professor Nərgiz Paşayeva, Dövlət İmtahan Mərkəzinin Direktorlar Şurasının sədri Məleykə Abbaszadə, Oksford Universitetinin Nizami Gəncəvi adına Azərbaycanşünaslıq və Qafqazşünaslıq Elmi Mərkəzinin İngiltərə tərəfindən rəhbəri, professor Robert Hoyland və digər tədbir iştirakçıları stendlə tanış olublar.

Stenddə muzeydə 2016-cı il ərzində müxtəlif istiqamətlərdə aparılmış elmi tədqiqatların nəticələrini əks etdirən əsər və kitablar, monoqrafiyalar, jurnal və bukletlər, impakt-faktorlu jurnallarda dərc edilmiş elmi məqalələr öz əksini tapıb.

Həmçinin muzeyin beynəlxalq əməkdaşlıq, elmi-kütləvi, elmi-təşkilati fəaliyyəti üzrə görülən işləri təqdim edən videoçarx nümayiş olunub.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.