AMEA Nizami Gəncəvi adına Milli Azərbaycan Ədəbiyyatı Muzeyində keçirilən növbəti elmi seminar məşğələsi müasir Amerika ədəbiyyatının tanınmış nümayəndələrindən olan çin mənşəli yazıçı Maksin Hong Kinqston yaradıcılığında irqçilik, köləliyə qarşı səsləndirilən multikultural dəyərlərin araşdırılmasına həsr olunub.

Elmi seminarda Dillər Universitetinin müəllimi, muzeyin dissertantı Pərvin Mürsəlova mövzu ilə bağlı çıxış edərək, hindu-amerikan, afro-amerikan, çinli-amerikan və s. əsilli yazıçıların yaradıcılığından danışıb. O, bu cür etnorəngarəngliyin multikultural dəyərlərin bərqərar olduğu bir ədəbiyyatın yaranmasına səbəb olduğunu bildirib.

Məruzəçi Uolt Uitmen, Lənqston Hyuz, Alis Volker kimi yazıçıların yaradıcılığına istinad edərək, Amerika ədəbiyyatının zənginliyinin əsas əlamətlərindən biri kimi bu söz sərvətinin ölkədə yaşayan xalqların müxtəlifliyi və fərqliliyinin olduğunu vurğulayıb.

Daha sonra diqqəti Maksin Hong Kinqston yaradıcılığından konkret nümunələrə yönəldən Pərvin Mürsəlova Amerikadakı ictimai-siyasi mühit, xalqların birgə yaşayışının özünəməxsusluqları və bütün bunların multikultiral ruhlu ədəbiyyatda əks olunması, həmçinin ölkədə sülhə çağırış ideyalarının fəallaşmasında ədəbiyyatın danılmaz rolu barədə müfəssəl məlumat verdi.

Seminar məşğələsi filologiya üzrə fəlsəfə doktoru Natavan Mustafayeva, filologiya üzrə fəlsəfə doktoru Nəzmiyyə Yigitoğlu, sənətşünaslıq üzrə fəlsəfə doktoru Nailə Əliyeva və başqalarının sual və çıxışları ilə davam edib.

Sonda doktorant Pərvin Mürsəlova yaxın zamanlarda Maksin Hong Kinqston yaradıcılığı ilə oxucuları ana dilimizdə tanış edəcək tərcümə kitabını hazırladığını diqqətə çatdırıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.