Muzeyin Qadınlar Şurasının ilk iclası keçirilib + Foto Apr 05, 2019 | 16:11 / Konfranslar, İclaslar

AMEA Nizami Gəncəvi adına Milli Azərbaycan Ədəbiyyatı Muzeyində yeni təsis olunmuş Qadınlar Şurasının ilk iclası keçirilib.

Tədbirdə təşkilatın sədri, filologiya üzrə fəlsəfə doktoru Sevinc Ayazqızı Azərbaycan Milli Elmlər Akademiyası nəzdində 2018-ci ildən fəaliyyətə başlamış Qadınar Şurası, onun əsas nizamnaməsi, qarşıya qoyduğu məqsəd və vəzifələr barədə məlumat verib. Bildirib ki, şuranın təşkilatçılığı ilə may ayında ulu öndər Heydər Əliyevin anadan olmasının 96-cı ildönümünə həsr olunmuş “ Heydər Əliyev: elm, gender, idarəetmə” mövzusunda beynəlxalq konfrans keçiriləcək. S.Ayazqızı muzeyin elmi yaradıcılıqla məşğul olan qadın əməkdaşlarını bu beynəlxalq tədbirdə fəal iştiraka dəvət edib.

İclasda, həmçinin Qadınlar Şurasının üzvləri cari ilin fəaliyyət planı ətrafında müzakirələr apararaq müvafiq təkliflər irəli sürüblər.

Muzeyin elmi işlər üzrə direktor müavini, professor Xatirə Bəşirli, Ekspozisiyanın qorunması, izahı və audio müşaiyətin təmini şöbəsinin müdiri Tomiris Babanlı, filologiya üzrə fəlsəfə doktoru Natavan Mustafayeva, Xurşidbanu Natəvan adına Qarabağ filialının kiçik elmi işçisi Məhsəti Əhmədova, Həmkarlar İttifaqı Komitəsinin sədri Ceyran Qənbərli və digərləri il ərzində Milli Azərbaycan Ədəbiyyatı Muzeyində baş tutacaq elmi sessiyalar, konfrans və seminarlar, yubiley tədbirləri barədə fikirlərini bölüşüblər. Tədbirdə T.Babanlı muzeyin gənc kadrlarının iştirakı ilə tətbiqi sənət və yaradıcılıq dərnəklərinin yaradılması təklifini irəli sürüb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.

 

Video
Faydalı linklər
Facebook